|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 112 Hüküm no: 90 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Aron v. Tatos’un Yanik v. Begos’un boşadığı Rayu ile evlenmesi
Sâdır olan fermân-ı âlîlerine imtisâlen sahib-i arzuhâl Aron v. Tatos zimmî medîne-i Sivas kazâsına tâbi‘ Akpınar karyesi mütemekkinlerinden Rayu Nasârâniyenin bundan akdem zevc-i dâhili Yanik v. Begos zimmî mersûmeyi ıtlâk edip âyinleri üzere tatlîkini müş‘ir memhûr halâs kâğıdı i‘tâ eyledikden sonra mersûme Rayu Nasârâniyeyi mesfûr Tatos zimmî tezevvüc edip ecânibden bazı kimesneler zevc-i sâbıkın seni tatlîk etmedi deyü zevcesi mersûmeye müdâhale ve ta‘arruzdan hâlî olmadıklarından mahâllinde şer‘le rü’yet olunmak bâbında bir kıt‘a emr-i âlî istid‘âsında olduğu meâl-i arzuhâlden müstefâd olmağın bu sûretde tarafeyn Der-aliyye’de mevcûdlar olmadığından ne vechile tatlîk eylediği tebeyyün eden mevâddan olmamağla sahib-i arzuhâl mersûm Tatos zimmî ve mersûme Rayu nâm Nasârâni ile zevc-i sâbıkı mersûm Yanik zimmî mahâllinde terâfu‘-i şer‘-i şerîf olunmak iktizâ etmekle muvâfık-ı re’y-i sâmîleri olur ise kazâ-i mezbûr nâibine hitâben bir kıt‘a emr-i âlî i‘tâsı bâbında emr u fermân hazret-i men-lehu’l-emrindir.
Sene [12]49
|