Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 197 Hüküm no: 253 Orijinal metin no: [33b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Ali’nin altı sene yanında çalışan Kâmile Hanım’ın alacağını ödemesi 720 guruş hüküm Ma‘rûz Sâhibe-i arzuhâl mu’arrefetü’z-zât Kâmile bt. Abdülkerim nâm hatun İstanbul Bâb Mahkemesi’nde meclis-i şer‘-i münîrde derûn-ı arzuhâlde ismi mezkûr Hafız Ali b. Hasan nâm kimesne muvâcehesinde ben bundan akdem merkūm Hafız Ali ile beher şehr onar guruş ücret mukāvelesiyle İstanbul’da Hırka-i şerîf kurbünde Molla Ahaveyn mahallesinde vâki’ menzilinin bin iki yüz kırk sekiz senesi Muharremi’l-harâmı gurresinden elli dört senesi Zilhiccetü’ş-şerîfesi gāyetine gelince altı sene ber-mu‘tâd menzilinde hizmet ve ba‘dehu mufârakat etmemle müddet-i merkūmede ecr-i müsemmâ-yı mezkûremden müctemi‘ mezbûrun zimmetinde muhik alacağım olan yedi yüz yirmi guruşu merkūm Hafız Ali Ağa’dan hâlâ taleb ederim deyü ba‘de’d-da‘vâ ve’l-inkâr müdde‘iyye-i mezbûre ber-vech-i muharrer müdde‘âsına ikāmet-i beyyine edemeyip bi’t-taleb mezbûr Hafız Ali Ağa’ya bi’l-muvâcehe ber-nehc-i şer‘î yemîn teklîf olundukda ol dahi yemînden nükûl etmeğin mûcebince meblağ-ı mezkûr yedi yüz yirmi guruşu müdde‘iyye-i mezbûre Kâmile Hatun’a edâ ve teslîme merkūm Hafız Ali Ağa’ya tenbîh olunduğu huzûr[-ı âlîlerine i‘lâm olundu] Fî-gurreti Zilka‘de sene [12]55