Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 198 Hüküm no: 256 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa’nın Mehmed Ağa’daki alacağını taksite bağladığı 1140 guruş te’cîl Ma‘rûz Derûn-ı arzuhâlde mezkûrü’l-ism es-Seyyid Hüseyin Ağa b. es-Seyyid Osman nâm kimesne İstanbul’da Bâb Mahkemesi’nde meclis-i şer’de sâhib-i arzuhâl Mehmed Ağa b. el-Hâc Mehmed nâm kimesne muvâcehesinde mezbûr Mehmed Ağa zimmetinde bundan akdem mâlımdan ve yedimden iştirâ ve kabz eylediği ma‘lûmü’l-aded ve’l-fiât sahtiyân semeninden bin yedi yüz kırk guruş alacak hakkım olmağla meblağ-ı mezkûru mezbûr Mehmed Ağa’dan hâlâ taleb ederim deyü tasaddî eylediğim da‘vâmdan bâ-tavassut-ı muslihîn mezbûr Mehmed Ağa ile bi’t-tav‘ ve’r-rızâ bin yüz kırk guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve işbu târîhe gelince sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile <> kabûlü hâvî <> ba‘de<<’el-ikrâr>>’l-ibrâ ve’l-iskāt ibrâdan müstesnâ bedel-i sulh-ı mezkûr bin yüz kırk guruşu hâlen ve def‘aten bir vechile edâya iktidârı olmayıp ber-vech-i âtî te’cîle tâlib olduğunda ben dahi beher şehr seksener guruş verip mecmû‘unu târîh-i i‘lâmdan on dört ay yedi gün tamâmına değin tamâmen bana edâ ve îfâ etmek üzere rızâmla medyûnum mezbûru te’cîl ve taksît eyledim deyü mukırr-ı merkūm es-Seyyid Hüseyin Ağa’nın bi’l-cümle takrîr-i meşrûhunu mezbûr Mehmed Ağa tasdîk ve bedel-i sulh-ı mezkûr bin yüz kırk guruşu ber-vech-i muharrer müeccelen ve mukassaten dâyinleri merkūm es-Seyyid Hüseyin Ağa’ya edâya ta‘ahhüd eylediği huzûr[-ı âlîlerine i‘lâm olundu] Fî 5 Şevvâl sene 1255