Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 199 Hüküm no: 257 Orijinal metin no: [34a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çekici Hüseyin’in Merkit v. Karabet aleyhine açtığı alacak davasına itibar edilmediği Men‘ Ma‘rûz Çekici Hüseyin b. Süleyman nâm kimesne İstanbul Bâb Mahkemesi’nde meclis-i şer’de Merkit v. Karabet nâm zimmî muvâcehesinde İstanbul’da Sanmaz nâm mahâlde vâki‘ mersûmun mutasarrıf olduğu bir bâb alçıcı dükkânında müşâhereten müstecir olan gāib ani’l-meclis Parsih zimmî zimmetinde odun semeninden üç yüz guruş alacak hakkım olup lâkin meblağ-ı mezkûra mersûm Merkit zimmî kefîl olmayıp mücerred gāib-i mersûm Parsih zimmînin dükkân-ı mezkûrda müsteciri olmağla öyle olacak meblağ-ı mezkûru mersûm Merkit zimmî bana mâlından versin deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı kendiye tefhîm ve da‘vâ-yı mezkûresiyle mersûm Merkit zimmîye bî-vech-i şer‘î mu‘ârazadan men‘ olunduğu mübâşirleri Bâb-ı Seraskerî kavaslarından Karagümrüklü Mustafa Kavas kulları yediyle huzûr[-ı âlîlerine i‘lâm olundu] Fî 22 Şevvâl sene [12]55