Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 200 Hüküm no: 259 Orijinal metin no: [34a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed İzzet Ağa’nın Tuhafiyeci Mihal’deki alacağını taksitlerle tahsil edeceği 500 guruş te’cîl Ma‘rûz Terlikçi esnâfından es-Seyyid Mehmed İzzet Ağa b. el-Hâc Mehmed Emin nâm kimesne İstanbul Bâb Mahkemesi’nde meclis-i şer‘de Tuhafçı Mihal v. İstori nâm zimmî muvâcehesinde mersûm Mihal zimmî zimmetinde bundan akdem mâlımdan ve yedimden ikrâz ve kabz ve umûruna sarfla istihlâk eylediği bâ-temessük bin beş yüz guruş alacak hakkım olmağla meblağ-ı mezkûru medyûnum mersûm Mihal zimmînin hâlen def‘aten edâya iktidârı olmayıp ber-vech-i âtî istimhâl eylediğinde ben dahi meblağ-ı mezkûrun sülüsü olan beş yüz guruşu târîh-i i‘lâm şehrinin yirmi altıncı günü ve diğer sülüsü olan beş yüz guruşu işbu sene-i mübâreke Zilka‘detü’ş-şerîfesi’nin yirmi üçüncü günü ve âhar sülüsü olan beş yüz guruşu dahi sene-i mezkûre Zilhiccetü’ş-şerîfesi’nin yirmi üçüncü günü tamâmen bana edâ ve îfâ etmek üzere rızâmla medyûnum mersûm Mihal’i imhâl ve tehîr eyledim dedikde ol dahi deyn-i meblağ-ı mezkûru ikrâr ü i‘tirâf ve meblağ-ı mezkûru ber-vech-i muharrer mümehhilen ve muahharan dâyini müdde‘î-i merkūma edâya müte‘ahhid olduğu huzûr[-ı âlîlerine i‘lâm olundu] Fî 22 Şevvâl sene [12]55