Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 201 Hüküm no: 261 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Foti v. Vaho’nun emanet aldığı paranın tamamını sahibine iade ettiği Men‘ Ma‘rûz Kasab tâifesinden sâhib-i arzuhâl Foti v. Vaho nâm zimmî İstanbul Bâb Mahkemesi’nde meclis-i şer‘-i hatîrde derûn-ı arzuhâlde mastûrü’l-ism <> Atanaş v. Yani muvâcehesinde mersûm Foti zimmî emînim olmak hasebiyle ben târîh-i i‘lâmdan dokuz buçuk ay mukaddem mesfûr Atanaş zimmî yedine mâlımdan li-ecli’l-hıfz dokuz yüz seksen guruş îdâ‘ ve teslîm eylediğimde ol dahi ahz u kabz eyledikden sonra <> meblağ-ı mezkûrun dört yüz seksen guruşunu işbu sene-i mübâreke Muharremi’l-harâmı gurresinde bana def‘ ü teslîm edip bâkīsi olan beş yüz guruşu bana vermeyip yedinde kalmağla meblağ-ı bâkī-i mezkûr beş yüz guruşu bana teslîme mesfûr Anaştaş zimmî[ye] tenbîh olunmak matlûbumdur deyü da‘vâ ettikde ol dahi cevâbında ikrâr lâkin meblağ-ı bâkī-i mezkûr beş yüz guruşu zikr olunan Muharremi’l-harâmının onuncu günü mahrûse-i Galata’ya muzâfe kasaba-i Beşiktaş’da Ustoyo zimmînin selhhânesinde müdde‘î-i mersûma tamâmen def‘ ü teslîm etmemle meblağ-ı mezkûrdan yed ve zimmetimde bir nesne bâkī kalmamışdır deyü müdde‘î-i mersûmun inkârına mukārin eylediği def‘inde mersûm Atanaş zimmî şer‘an yemîniyle tasdîk olunmağın bi’t-taleb mesfûr Atanaş zimmîye bi’l-muvâcehe vech-i şer‘î üzere yemîn verilmeğin mûcebince müdde‘î-i mesfûr Foti zimmî da‘vâ-yı mezkûresiyle mersûm Atanaş zimmîye bî-vech-i şer‘î mu‘ârazadan men‘ olunduğu huzûr[-ı âlîlerine i‘lâm olundu] Fî 11 Şevvâl sene [1]255