Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 202 Hüküm no: 262 Orijinal metin no: [34b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan İstirati ile Tuğlacı Agob’un aralarındaki darb ve akçe davalarında sulh oldukları Darb da‘vâsından 20 guruşa sulh Ma‘rûz Bahçıvan tâifesinden arzuhâl eden İstirati v. Petro nâm zimmî İstanbul Bâb Mahkemesi’nde meclis-i şer‘-i hatîrde derûn-ı arzuhâlde ismi mastûr Tuğlacı Agop v. Manil nâm zimmî muvâcehesinde işbu târîh-i i‘lâmdan on gün mukaddem İstanbul’da Samatya kurbünde Ayamina Kilisesi sûkunda mersûm Agop zimmî benim üzerime <> hücûm ve bi-gayri hakkın beni darb eylediğinden başka beyaz kese derûnunda mevcûd mâlımdan yetmiş guruşluk ecnâs akçemi fuzûlî ahz ü istihlâk etmekle darb-ı mezbûrun mûcib-i şer‘îsiyle meblağ-ı mezkûr yetmiş guruşu mersûm Agop zimmîden tazmîn taleb ederim deyü tasaddî eylediğim da‘vâmdan bâ-tavassut-ı muslihîn mersûm Agop zimmî ile kat‘an-li’n-nizâ‘ bi’t-tav‘ ve’r-rızâ yirmi guruş bedel-i medfû‘ ve makbûza ba‘de-akdi’l-musâlaha ve’l-kabûl ziyâde müdde‘âma ve bi’l-cümle husûs-ı mezkûra ve hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri tescîl ve huzûr[-ı âlîlerine i‘lâm olundu] Fî 15 Şevvâl sene [12]55