Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 202 Hüküm no: 263 Orijinal metin no: [34b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boyacı Kabril’in Halil b. Mehmed’deki alacağının sûret-i tahsili Cihet-i havâle meşrû‘a olmadığı Ma‘rûz Boyacı esnâfından Kabril v. Ebik nâm zimmî İstanbul Bâb Mahkemesi’nde meclis-i şer‘de sucu esnâfından Halil b. Mehmed nâm kimesne muvâcehesinde mezbûr Halil zimmetinde cihet-i karzdan dokuz yüz elli guruş alacak hakkım olup onun dahi gāib ani’l-meclis Sıvacı Kadri b. Hasan b. Abdullah nâm kimesne zimmetinde cihet-i deyn-i şer‘îden ol mikdâr alacağı olmağla merkūm Halil işbu târîh-i i‘lâmdan altı ay mukaddem İstanbul’da Sultanmehmed civârında Nakib Hanı’nda sıvacılar kethüdâsının kahve dükkânında üçümüz bir meclisde hâzır olduğumuz hâlde deyn-i mezkûruyla beni ol mikdâr medyûnu gāib-i merkūm Kadri Ağa üzerine havâle-i sahîha-i şer‘iye ile havâle ve her birimiz havâle-i mezkûreyi kabûl etmişidik el-hâletü hâzihî meblağ-ı muhâlün-bih-i mezkûru gāib-i merkūm Kadri Ağa el-yevm bana edâ etmemekle meblağ-ı mezkûr dokuz yüz elli guruşu merkūm Halil’den hâlâ taleb ederim deyü tasaddî eylediği da‘vâsı mütehakkık ...? değil iken meşrû‘a ve iltifâta şâyân olmadığı müdde‘î-i mersûm Kabril zimmîye tefhîm olunduğu huzûr[-ı âlîlerine i‘lâm olundu] Fî-gurreti Zilka‘de sene [12]55