Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 203 Hüküm no: 264 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Süleyman’ın vefat eden Mehmed b. Osman’a olan borcunu varislerine ödemesi 268 guruş hüküm Ma‘rûz Mahrûse-i Edirne mahâllâtından Debbâğlar mahallesinde sâkin iken bundan akdem vefât eden Mehmed b. Osman b. Abdullah’ın verâseti zevce-i menkûha-i metrûkeleri Naile bt. Ali ve Havva bt. Abdullah nâm hatunlar ile mezbûre Naile Hatun’dan mütevellidler sulbî kebîr oğlu Osman ve sulbiye kebîre kızı Fâtıma Hatun’a münhasıra ba‘dehu merkūme Naile Hatun dahi vefât edip verâseti sadrî oğlu merkūm Osman ile sadrî kızı Fâtıma Hatun’a münhasıra ve tashîh-i mesele bi-tarîkı’l-münâsaha ve’l-ihtisâb on altı sehmden olup sihâm-ı mezbûrdan bir sehmi zevce-i merkūme Havva Hatun’a ve on sehmi merkūm Osman’a ve beş sehmi mezbûre Fâtıma Hatun’a isâbeti tahakkukundan sonra verese-i mezbûrûndan merkūm Osman İstanbul Bâb Mahkemesi’nde meclis-i şer‘-i münîrde Süleyman b. Süleyman nâm kimesne muvâcehesinde pederim mûrisim müteveffâ-yı evvel-i merkūm Mehmed’in merkūm Süleyman zimmetinde bâ-temessük cihet-i karzdan dört yüz otuz guruş alacak hakkı olup meblağ-ı mezkûru kable’l-ahz <> ve’l-istîfâ fevt olup ve meblağ-ı mezkûr benimle mezbûretân Havva ve Fâtıma hatunlara mevrûs olmağla meblağ-ı mezkûr dört yüz otuz guruşdan ber- i‘tibâr-ı merkūm hisse-i irsiyeme isâbet eden iki yüz altmış sekiz guruş otuz sekiz parayı merkūm Süleyman’dan bi’l-verâse hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin ben deynim olan meblağ-ı mezkûru bin iki yüz kırk üç senesi hilâlinde İstanbul’da Karagümrük kurbünde Hadice Sultan mahallesinde vâki‘ mutasarrıf olduğum menzilimde <> müteveffâ-yı evvel-i merkūm Mehmed’e hayatında tamâmen edâ ve teslîm etmişidim deyü müdde‘î-i mezbûrun inkârına mukārin eylediği def‘ine ikāmet-i beyyine edemeyip bi’t-taleb merkūm Osman’a bi’l-muvâcehe adem-i ilme yemîn verilmeğin mûcebince meblağ-ı mezkûr iki yüz altmış sekiz guruş otuz sekiz parayı müdde‘î-i merkūm Osman’a edâya merkūm Süleyman’a tenbîh olunduğu mübâşirleri Bâb-ı Seraskerî kavaslarından İsmail Kavas kulları yediyle huzûr[-ı âlîlerine i‘lâm olundu] Fî 19 Şevvâl sene [12]55