Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 204 Hüküm no: 265 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalaycı Ali Ağa’nın borcunu ödemesi 2100 guruşa hüküm Ma‘rûz Bâ‘isü’l-i‘lâm Kostandi v. Yani nâm zimmî İstanbul Bâb Mahkemesi’nde meclis-i şer‘de kalaycı esnâfından es-Seyyid Ali Ağa b. es-Seyyid Hüseyin nâm kimesne muvâcehesinde bundan akdem merkūm es-Seyyid Ali Ağa ile beher şehr yüz seksener guruş ücret mukāvelesiyle mahrûse-i Galata’ya <> muzâfe kasaba-i Beşiktaş’a tâbi‘ Arnavudköy nâm mahâlde vâki‘ bir bâb kalaycı dükkânında sene-i sâbıkā Şevvâli’l-mükerremi gurresinden işbu elli beş senesi şehr-i Ramazani’l-mübâreki gāyetine gelince ber-mu‘tâd ve bir sene merkūm es-Seyyid Ali Ağa’ya hizmet ve ba‘dehu müfârakat etmemle müddet-i mezkûrede müctemi‘ merkūmun zimmetinde alacak hakkım olan iki bin yüz altmış guruşu mezbûr es-Seyyid Ali Ağa’dan hâlâ taleb ederim deyü ba‘de’d-da‘vâ ve’l-istintâk merkūm es-Seyyid Ali Ağa dahi cevâbında müdde‘î-i mersûm <> ancak müddet-i mezkûrede istihdâmını ikrâr lâkin beher şehr yüz seksener guruş kavl-i mezkûr müdde‘âsını inkâr etmekle müdde‘î-i mersûm ber-vech-i muharrer müdde‘âsını adl ve makbûlü’ş-şehâde idikleri ihbâr olunan Kalaycı Emin Ağa b. Ahmed ve Kazgancı Ahmed b. Ahmed nâm kimesneler şehâdetleriyle bi’l-muvâcehe vech-i şer‘î üzere isbât etmeğin mûcebince meblağ-ı mezkûr iki bin yüz altmış guruşu müdde‘î-i mesfûr Kostandi zimmîye edâ ve teslîme mezbûr es-Seyyid Ali Ağa’ya tenbîh olunduğu huzûr[-ı âlîlerine i‘lâm olundu] Fî 26 Şevvâl sene [12]55