Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 204 Hüküm no: 266 Orijinal metin no: [35a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sava v. Estori’nin Eşar v. İlya’dan alacaklı olduğu yolundaki iddiasını ispatlayamadığı Men‘ Arzuhâl eden Sava v. Estori nâm zimmî İstanbul Bâb Mahkemesi’nde meclis-i şer‘-i hatîrde derûn-ı arzuhâlde mastûrü’l-ism Eşar v. İlya nâm Yahûdi muvâcehesinde mesfûr Eşar Yahûdi zimmetinde bundan akdem mâlımdan ve yedimden iştirâ ve kabz eylediği cins ve fiâtı beynimizde ma‘lûm balık semeninden bin üç yüz elli guruş alacak hakkım olup hattâ cihet-i mezkûreden ol mikdâr guruş zimmetinde bana deyni olduğunu Yahûdi-i mesfûr şehr-i sâbık Şevvâli’l-mükerremi’nin on beşinci günü İstanbul hısnı ebvâbından Balıkpazarı kapısı hâricinde vâki‘ Yoğurtcuoğlu odasında mahzar-ı şuhûdda ikrâr ü i‘tirâf dahi ettikden sonra meblağ-ı mezkûrun iki yüz doksan altı guruşunu mersûm Eşar Yahûdi bana edâ ve teslîm etmekle bâkīsi olan bin elli dört guruşu mesfûr Eşar Yahûdi’den hâlâ taleb ederim deyü hâmiş-i arzuhâlde mastûr mahrûse-i Galata Mahkemesi’nden verilen [35b] i‘lâm nâtık olduğu üzere ba‘de’d-da‘vâ ve’l-inkâr müdde‘î-i mersûm ber-vech-i muharrer müdde‘âsına ikāmet-i beyyine edemeyip bi’t-taleb mesfûr Eşar Yahûdi’ye bi’l-muvâcehe vech-i şer‘î üzere yemîn verilmeğin mûcebince müdde‘î-i mesfûr Sava zimmî da‘vâ-yı mezkûresiyle mesfûr Eşar Yahûdi[‘ye] bilâ-beyyine mu‘ârazadan men‘ olunduğu huzûr[-ı âlîlerine i‘lâm olundu] Fî 2 Zilka‘de sene [12]55