Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 205 Hüküm no: 267 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa b. Veliyyüddin ve Ayşe Hanım’ın ortak oldukları ve hamallar tarafından batırılan mavnaları için Hamallar Kethüdası İbrahim’den tazminat talebinde bulunmalarının geçerli olmadığı Meşrû‘a olmadığı Ma‘rûz Sâhib-i arzuhâl Musa b. Veliyyüddin nâm kimesne ile mu‘arrefetü’z-zât Âişe bt. Süleyman nâm hatun İstanbul Bâb Mahkemesi’nde meclis-i şer‘-i münîrde Eminönü İskelesi hamallar kethüdâsı derûn-ı arzuhâlde ismi mezkûr İbrahim b. Mahmud nâm kimesne muvâcehesinde arka hammalânından Kengirili (Çankırılı) Ömer oğlu Ömer b. Osman ve Tutoğlu İbrahim b. Osman nâm kimesneler hâzır oldukları hâlde münâsafeten mülkümüz olup Salaporya ta‘bîr olunur bir kıt‘a mavna işbu sene-i mübâreke Şevvâli’l-mükerreminin onucu günü Kurşunlumahzen İskelesi’nden hamûlesiyle Eminönü İskelesi’ne geldikde iskele-i mezbûr hamallarından ismi ma‘lûmumuz olmayan gāibûn ani’l-meclis on beş nefer kimesneler mavna-i mezkûr derûnuna hücûm edip zikr olunan mavnayı deryâya gark etmeleriyle mücerred mezbûr gāibûn-ı mezbûrûnun kethüdâları olmağla gāibûn-ı mezbûrûnu teslîme veyâhud kıymeti olan bin beş yüz guruşu bize mâlından edâya mezbûr İbrahim’e cebr olunmak matlûbumuzdur deyü takrîr-i meşrûhları üzere tasaddî eyledikleri da‘vâları meşrû‘a ve iltifâta şâyân olmadığı müdde‘iyyân-ı mezbûrâna tefhîm ve da‘vâ-yı mezkûreleriyle mezbûr İbrahim’e bî-vech-i şer‘î mu‘ârazadan men‘ olunduğu huzûr[-ı âlîlerine i‘lâm olundu] Fî 2 Zilka‘de sene [12]55