Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 205 Hüküm no: 268 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtımatüzzehra Hanım’a kocasına itaat etmesi hususunda tenbihte bulunulduğu İta‘ate tenbîh Ma‘rûz İstanbul’da Kumkapı kurbünde Tavâşî Süleymanağa mahallesinde sâkin sâhib-i arzuhâl Mâliye Muhâsebesi Kalemi ketebesinden Mehmed Şükrü Efendi b. Ahmed nâm kimesne İstanbul Bâb Mahkemesi’nde meclis-i şer‘de derûn-ı arzuhâlde mezkûretü’l-ism zevcesi mu‘arrefetü’z-zât Fâtımatüzzehrâ bt. Mustafa nâm hatun muvâcehesinde mezbûre Fâtımatüzzehrâ Hatun yüz elli guruş mehr-i müeccel tesmiyesiyle zevce-i menkûha-i medhûlün-bihâm olup lâkin bana itâ‘at ve hukūk-ı zevciyyete mürâ‘at etmemekle suâl olunup mahalle-i mezbûrede vâki‘ mesken-i şer‘î olan menzilime gelip bana itâ‘at ve hukūk-ı zevciyyete mürâ‘at etmek üzere zevcem mezbûre Fâtımatüzzehrâ Hatun’a tenbîh olunmak murâdımdır deyü da‘vâ ettikde ol dahi cevâbında kaziyye minvâl-i meşrûh üzere olduğunu ikrâr ü i‘tirâf etmeğin mûcebince zevci müdde‘î-i mezbûrun menziline gidip itâ‘at ve hukūk-ı zevciyyete mürâ‘at etmek üzere mezbûre Fâtıma Hatun’a tenbîh olunduğu huzûr[-ı âlîlerine i‘lâm olundu] Fî 2 Zilka‘de sene [12]55