Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 209 Hüküm no: 275 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeliha Hatun’un boşandığı kocası Salih Ağa’ya açtığı alacak davasında haksız bulunduğu Adem-i iltifât Ma‘rûz Sâhibe-i arzuhâl mu‘arrefetü’z-zât mu‘taka Zenciye Zeliha Hatun bt. Abdullah İstanbul Bâb Mahkemesi’nde meclis-i şer‘-i münîrde mevlâsı ve zevc-i sâbıkı Dîvân-ı âlî çavuşlarından derûn-ı arzuhâlde ismi mezkûr Salih Ağa b. Ahmed nâm kimesne muvâcehesinde mevlâm mezbûr Ahmed Ağa işbu elli beş senesi şehr-i Ramazani’l-mübârekinin onuncu günü mâlından beni âzâd ve i‘tâk ve ba‘dehu yüz bir guruş mehr-i müeccel tesmiyesiyle beni tezevvüc ve dahl ve bir ay mukaddem beni tatlîk edip ancak mezbûr Salih Ağa beni hîn-i tezevvücde bu‘du eğer seni tatlîk ve yâhûd bi-emrillâhi te‘âlâ vefât eder isem bin guruş sana borcumdur deyü va‘ad etmişidi el-hâletü hâzihî meblağ-ı mezkûr bin guruş ile kable’l-ıtk telebbüs ve isti‘mâle bana verdiği mecmû‘u bin yüz yirmi beş guruş kıymetli beledî bir döşek ve bir şilte ve iki yorgan ve iki çârşeb ve üç basma yasdık ve bir basma anteri ve bir çukaya kaplı nîmten samur kürk ve bir destgâh ve bir hamam takımını mevlâm merkūm menzilinde alıkoymağla eşyâ-i muharrere-i mezkûreyi bana vermek üzere mevlâm mezbûr Salih Ağa’ya tenbîh olunmak murâdımdır deyü takrîr-i meşrûhu üzere tasaddî eylediği da‘vâları meşrû‘a ve iltifâta şâyân olmadığı müdde‘iyye-i mezbûre Zeliha Hatun’a tefhîm ve da‘vâ-yı mezkûreleriyle merkūm Salih Ağa’ya bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] Fî 11 Zilka‘de sene [12]55