.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 113
Hüküm no: 92
Orijinal metin no: [20a-4]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Halep Mankuşe Çarşısı dışındaki bir handa sahip olduğu keyyallık hissesi beratını kaybeden Seyyid Mehmed Haşim’e yeniden berat verilmesi

Sâdır olan fermân-ı âlîlerine imtisâlen işbu arzuhâl ve derkenâra nazar olundukda Haleb-i şehbâda vâki‘ Mankuşe Çarşusu bîrûnunda bir bâb hânda keyyâllığın sülüs hissesine bâ-berât-ı âlî mutasarrıf olan sahib-i arzuhâl es-Seyyid Mehmed Hâşim b. Osman dâ‘îleri yedinde mahfûz olan beratını bi-kazâillâhi te‘âlâ zâyi‘ olduğundan bahisle zâyi‘inden müceddeden bir kıt‘a berat-ı şerîf-i âlîşân sadaka ve ihsân buyurulmak ricâsında olduğu meâl-i arzuhâlden müstefâd ve sülüs hisse keyyâllık-ı mezkûre vazîfe-i mu‘ayyene ile merkūm es-Seyyid Mehmed Hâşim b. Osman üzerinde olduğu derkenârdan müstebân ve sahib-i arzuhâl merkūm es-Seyyid Mehmed Hâşim sahib-i berat olup sülüs hisse-i mezkûreye mutasarrıf olduğu medîne-i mezbûr ahâlîsinden Der-aliyye’de müsâfiren sâkinler es-Seyyid el-Hâc Abdülkadir b. es-Seyyid el-Hâc Süleyman ve es-Seyyid Ahmed Necib b. es-Seyyid el-Hâc Süleyman nâm kimesnelerin alâ-tarîkı’ş-şehâde haber vermeleriyle zâhir ve mütehakkık olmağın ber-vech-i istid‘â sahib-i arzuhâl merkūm es-Seyyid Mehmed Hâşim b. Osman dâ‘îleri yedine zâyi‘den müceddeden bir kıt‘a berat-ı şerîf-i âlîşân sadaka ve ihsân buyurulmak emr-i savâb idiği huzûr-ı âlîlerine i‘lâm olundu.

Sene [12]49