.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 113
Hüküm no: 93
Orijinal metin no: [20b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Düşenbe kazası Narağacı köyü camii imamı Mehmed’in vefatıyla yerine Seyyid Mehmed b. Veliyüddin’in tayini

Ma‘rûz,

Sâdır olan fermân-ı âlîlerine imtisâlen işbu arz ve derkenâra nazar olundukda vilâyet-i Anadolu’da Senir ma‘a Düşenbe kazâsına muzâfe Narağacı karyesinde vâki‘ sahibü’l-hayrât Şabanzâde Mustafa’nın binâ eylediği câmi‘-i şerîfde yevmî rub‘ akçe vazîfe ile bâ-berât-ı âlî imâm olan Mehmed fevt oldukda mahlûlünden 37 senesi Şevval’inde kazâ-i mezbûr nâibi esbak es-Seyyid Osman Efendi’nin arzıyla Abdülbaki b. Ali’ye tevcîh olunmuş ise de merkūm Abdülbaki terk-i hizmet olup ref‘inden yerine erbâb-ı istihkākdan es-Seyyid Mehmed b. Veliyüddin dâ‘îlerine tevcîh olunmasını kazâ-i mezbûr nâibi es-Seyyid Mehmed Tahir Efendi dâ‘îleri işbu mührü mutâbık arzıyla inhâ etmeğin fi’l-hakīka cihet-i mezkûre müteveffâ-yı merkūmun mahlûlünden Abdülbaki b. Ali’nin üzerinde olduğu derkenârdan müstebân ve merkūm Abdülbaki’nin terk-i hizmet olup yerine vekîl nasb etmemekle derûn-ı arzda muharrerü’l-ism es-Seyyid Mehmed’in imâmet-i mezkûreye ehl ü liyâkati kazâ-i mezbûr ahâlîsinden Der-aliyye’de müsâfiren sâkinler Ali b. Abdülkerim ve Mustafa b. Ahmed nâm mevsûku’l-kelim kimesnelerin alâ-tarîkı’ş-şehâde haber vermeleriyle zâhir ve nümâyân olmağın bu sûretde cihet-i mezkûru merkūm Abdülbaki b. Ali’nin ref‘inden mezbûr es-Seyyid Mehmed b. Veliyüddin dâ‘îlerine ber-mûceb-i arz tevcîh ve yedine berat-ı şerîf-i âlîşân sadaka ve ihsân buyurulmak husûsu re’y-i sâmîlerine menût idiği huzûr-ı âlîlerine i‘lâm olundu.

Sene [12]49