Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 211 Hüküm no: 280 Orijinal metin no: [37a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci İsmail Ağa’nın Memiko’ya açtığı alacak davasında sulh oldukları 18[0] guruşa sulh Ma‘rûz Keresteci İsmail Ağa b. el-Hâc Feyzullah nâm kimesne İstanbul Bâb Mahkemesi’nde meclis-i şer‘-i münîrde neccâr tâifesinin Midilli kolu neferâtından Memiko v. Yorgi nâm zimmî muvâcehesinde mesfûr Memiko zimmî zimmetinde bundan akdem mâlımdan ve yedimden iştirâ ve kabz eylediği ma‘lûmü’l-ecnâs ve’l-fiyat kereste semeninden bin elli guruş alacak hakkımın yedi yüz kırk yedi guruşunu mukaddemâ ceste ceste yedinden kabz ve istîfâ etmemle bâkīsi olan üç yüz üç guruşu mersûm Memiko zimmîden hâlâ taleb ederim deyü tasaddî eylediğim da‘vâ-yı mezkûremden bâ-tavassut-ı muslihîn zimmî-i mersûm ile bi’t-tav‘ ve’r-rızâ yüz seksen guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika âmme-i de‘âvîden tarafeynden her birimiz âharın zimmetini kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr yüz seksen guruşun müdde‘î-i mezbûr İsmail Ağa’ya edâsıyla mesfûr Memiko zimmî ilzâm olunduğu tescîl ve huzûr-ı [âlîlerine i‘lâm olundu] Fî 8 Zilka‘de sene [12]55