Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 212 Hüküm no: 281 Orijinal metin no: [37a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’a kocası Mehmed Efendi’ye itaat etmesi için tenbih yapıldığı İtâ‘ate tenbîh Ma‘rûz İstanbul’da Davudpaşa mahallesinde sâkin el-Hâc Mehmed Efendi b. Mehmed Salih nâm kimesne İstanbul Bâb Mahkemesi’nde meclis-i şer‘-i münîrde hâlâ zevcesi mu‘arrefetü’z-zât Emine bt. Mehmed Emin nâm hatun muvâcehesinde mezbûre Emine Hatun dört yüz elli guruş mehr-i müeccel tesmiyesiyle zevce-i menkûha-i medhûlün-bihâm olup lâkin bana itâ‘at ve hukūk-ı zevciyyete mürâ‘ât etmemekle suâl olunup mahalle-i mezbûrede vâki‘ tedârük ve müheyyâ eylediğim galak ve merâfıkı başka menzilime gelip bana itâ‘at ve hukūk-ı zevciyyete mürâ‘ât etmek üzere zevcem mezbûre Emine Hatun’a tenbîh olunmak murâdımdır deyü da‘vâ ettikde ol dahi cevâbında kaziyye minvâl-i muharrer üzere olduğunu bi-tamâmihi ikrâr ü i‘tirâf etmeğin mûcebince zevci müdde‘î-i merkūmun menziline gidip itâ‘at ve hukūk-ı zevciyyete mürâ‘ât etmek üzere merkūme Emine Hatun’a tenbîh olunduğu huzûr-ı [âlîlerine i‘lâm olundu] Fî 18 Zilka‘de sene [12]55