Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 216 Hüküm no: 288 Orijinal metin no: [38a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Poliçeci Serkiz’in Tütüncü Oseb’e olan borcunu ödemesi 600 guruş hüküm [Ma‘rûz] Derûn-ı arzuhâlde ismi mastûr Tütüncü Oseb v. Yordam nâm zimmî İstanbul Bâb Mahkemesi’nde meclis-i şer‘-i hatîrde arzuhâl eden Poliçeci Serkiz v. Filyoz nâm zimmî muvâcehesinde mersûm Serkiz zimmî zimmetinde târîh-i i‘lâmdan iki ay mukaddem mâlımdan ve yedimden iktirâz ve kabz ve umûruna sarfla istihlâk eylediği altı yüz guruş alacak hakkım olmağla meblağ-ı mezkûru zimmî-i mersûmdan hâlâ taleb ederim deyü da‘vâ ettikde ol dahi cevâbında ikrâr lâkin deynim olan meblağ-ı mezkûr altı yüz guruşu târîh-i i‘lâmdan on iki gün mukaddem İstanbul’da Çarşı-yı kebîr’de Kanbur Han’da vâki‘ odamda mersûm Oseb zimmîye tamâmen edâ ve teslîm etmişidim deyü müdde‘î-i mersûmun inkârına mukārin eylediği def‘ine ikāmet-i beyyine edemeyip tâlib-i tahlîf dahi olmamağın mûcebince dâfi‘-i mersûm def‘-i mezkûruyla mersûm Oseb zimmîye bilâ-beyyine mu‘ârazadan ba‘de’l-men‘ mersûm Serkiz zimmînin sâlifü’l-beyân ikrâr ü i‘tirâfıyla lâzım gelen meblağ-ı mezkûr altı yüz guruşu müdde‘î-i mersûm Oseb zimmîye edâ <> ve teslîme mesfûr Serkiz zimmîye tenbîh olunduğu huzûr-ı [âlîlerine i‘lâm olundu] Fî 17 Zilka‘de sene [1]255