.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 114
Hüküm no: 94
Orijinal metin no: [20b-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Ankara kazası Alibey mahallesi mescidi nukud vakfı mütevelliliği ile mescidin müezzin ve imamlığına mutasarrıf Seyyid İbrahim’in vefatıyla bu görevlere oğlu Seyyid Mehmed Kadri’nin tayin edilmesi

Ma‘rûz,

Sâdır olan fermân-ı âlîlerine imtisâlen işbu arzuhâl ve derkenâra nazar olundukda vilâyet-i Anadolu’da medîne-i Ankara kazâsında Alibey mahallesi mescid-i şerîfinin mihrâbına ve müezzin ve rakabesine meşrûta nükūd-ı mevkūfenin ber-vech-i hasbî mütevellîsi ve yine mescid-i mezbûrede vazîfe-i mu‘ayyene ile nısf imâmeti ve yevmî nîm akçe vazîfe ile müezzinlik cihetlerine mutasarrıf olan es-Seyyid İbrahim fevt olup yeri hâlî ve hizmet-i lâzımesi mu‘attal kaldığından bahisle müteveffâ-yı merkūmun sulbî kebîr oğlu es-Seyyid Mehmed Kadri dâ‘îleri kendüye tevcîh ve yedine berat-ı şerîf-i âlîşân i‘tâ olunmasını işbu arzuhâl ile istid‘â eder, fi’l-hakīka tevliyet-i mezkûr, müezzinlik-i mezbûre es-Seyyid İbrahim’in müstakillen ve imâmet-i mezkûre karındaşı es-Seyyid Mustafa ile bi’l-iştirâk üzerlerinde olduğu derkenârdan müstebân ve merkūm es-Seyyid İbrahim’in fevti vâki‘ ve sahib-i arzuhâl es-Seyyid Mehmed Kadri müteveffâ-yı merkūmun sulbî oğlu olup her vechile erbâb-ı istihkākdan idiği kazâ-i mezbûr ahâlîsinden Der-aliyye’de müsâfireten sâkinler ( ) nâm kimesnelerin haber vermeleriyle zâhir ve mütehakkık olmağın bu sûretde pederi müteveffâ-yı merkūmun mahlûlünden merkūm es-Seyyid Mehmed Kadri b. es-Seyyid İbrahim üzerine tevcîh ve yedine berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine i‘lâm olundu.

Sene [12]49