Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 217 Hüküm no: 291 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Ezek’in alacak davasıyla İbrahim Ağa’ya açtığı davayı ispat edemediği Men‘ Ma‘rûz Tüccâr tâifesinden arzuhâl eden Ezek v. Artin nâm zimmî İstanbul Bâb Mahkemesi’nde meclis-i şer‘de derûn-ı arzuhâlde ismi mezkûr İbrahim Ağa b. Abdullah nâm kimesne muvâcehesinde mezbûr İbrahim Ağa bin iki yüz elli dört senesi hilâlinde Anadolu’da Sivas sancağına tâbi‘ Erbain kazâsı voyvodası olduğu esnâda yüz elli bidre[müdre] harîrin gümrüğü olmak üzere mâlımdan bin sekiz yüz guruş ahz u kabz etmişidi el-hâletü hâzihî zikr olunan harîrin gümrüğü ancak sekiz yüz yirmi beş guruş olmağla ol vechile ziyâde medfû‘um olan dokuz yüz yetmiş beş guruşu merkūm İbrahim Ağa’dan istirdâd ederim deyü da‘vâ ettikde ol dahi cevâbında külliyen inkâr etmekle müdde‘î-i mesfûr ber-vech-i muharrer müdde‘âsına ikāmet-i beyyine edemeyip bi’t-taleb merkūm İbrahim Ağa bi’l-muvâcehe ber-nehc-i şer‘î tahlîf olunmağın mûcebince müdde‘î-i mesfûr Ezek zimmî da‘vâ-yı mezkûresiyle mezbûr İbrahim Ağa’ya bilâ-beyyine mu‘ârazadan men‘ olunduğu huzûr-ı [âlîlerine i‘lâm olundu] Fî 20 Zilka‘de sene [12]55