Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 219 Hüküm no: 294 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Kâmile’nin boşandığı kocası Abdullah Rifat Ağa’ya açtığı alacak davasında haksız bulunduğu Tatlîk Ma‘rûz Fi’l-asl Anadolu’da İznik kazâsı ahâlîsinden olup İstanbul’da Davudpaşa mahallesinde sâkine mu‘arrefetü’z-zât Şerife Kâmile bt. es-Seyyid Ali nâm hatun İstanbul Bâb Mahkemesi’nde meclis-i şer‘-i münîrde zevc-i sâbıkı etbâ‘dan es-Seyyid Abdullah Rifat Ağa b. es-Seyyid İbrahim Halil nâm kimesne muvâcehesinde merkūm es-Seyyid Abdullah Rifat Ağa ile bundan akdem zevciyyet beynimizde kāime iken li-ebeveyn er karındaşım olup verâseti ancak bana münhasıra olduğu hâlde vefât eden es-Seyyid Mehmed Sadeddin’in bi’l-cümle terekesinden olarak altı yüz altmış beş guruş nakid ile mecmû‘u dört bin guruş kıymetli eşyâ-i ma‘lûmesini merkūm es-Seyyid Abdullah Rifat Ağa fuzûlî ve bi-gayri hakkın ahz ve istihlâk etmekle nakd-i mezkûr altı yüz altmış beş guruş ve eşyâ-i mezkûrenin kıymetli [kıymetleri] olan dört bin guruş ki cem‘an dört bin altı yüz altmış beş guruşu mezbûr es-Seyyid Abdullah Rifat Ağa’nın yedinde olup sene-i sâbıkā yani bin iki yüz elli dört senesi Cumâdelûlâsı’nın altıncı günü târîhiyle müverrah bir kıt‘a i‘lâm-ı şer‘î mantûkunca merkūm es-Seyyid Abdullah Rifat Ağa’dan da‘vâ ve ber-vech-i muharrer müdde‘âmdan merkūm ile iki bin yedi yüz elli guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt edip ba‘dehu sene-i mezbûre Cumâdelâhiresi’nin üçüncü günü târîhiyle müverrah diğer bir kıt‘a i‘lâm-ı şer‘î nâtık olduğu üzere merkūm es-Seyyid Abdullah Rifat Ağa ile beynimizde adem-i hüsn-i mu‘âşeretimizden nâşî mezbûrun zimmetinde mütekarrir ve ma‘kūdün-aleyh mehr-i mu‘accel ve mehr-i müeccelim olan cem‘an sekiz yüz guruş ile nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere <> merkūm ile muhâla‘a-i sahîha-i şer‘iyye ile hul‘ olduğumda ol dahi hul‘-ı mezkûru ba‘de’l-kabûl ancak hukūk-ı zevciyyete müte‘allika da‘vâdan tarafeynden her birimiz âharın zimmetini kabûlü hâvî ibrâ ve iskāt eylediğimizden sonra merkūm es-Seyyid Abdullah Rifat Ağa bedel-i sulh-ı mezkûr iki bin yedi yüz elli guruşu bu esnâda ceste ceste tamâmen def‘ ü teslîm ben dahi yedinden ahz u kabz etmişidim el-hâletü hâzihî ben meblağ-ı mecmû‘-ı mezkûr dört bin altı yüz altmış beş guruşdan iki bin yedi yüz elli guruşa sulh ve ba‘dehu mehreyn-i mezkûreynim olan sekiz yüz bir guruş ile nafaka-i iddetim üzerine hul‘ ve ibrâma nâdim ve peşîmân olmamla bedel-i sulh-ı mezkûrun ziyâdesi olup ibrâ eylediğim bin dokuz yüz on beş [guruş] ile mehreyn-i mezkûreynim olan sekiz yüz bir guruş ki cem‘an iki bin yedi yüz on altı guruşu bana edâya merkūm es-Seyyid Abdullah Rifat Efendi’ye cebr olunmak murâdımdır deyü takrîr-i meşrûhu üzere tasaddî eylediği da‘vâları meşrû‘a ve iltifâta şâyân olmadığı müdde‘iyye-i mezbûre Şerife Kâmile Hatun’a tefhîm ve da‘vâ-yı mezkûreleriyle mezbûr es-Seyyid Abdullah Rifat Ağa’ya bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] Fî 16 Zilka‘de sene [12]55