Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 220 Hüküm no: 295 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Ağa’nın boşandığı hanımı Şerife Fâtıma’ya olan mehir bedeliyle çeşitli eşyalarını ödemesi Tatlîk Ma‘rûz İstanbul’da Aksaray kurbünde Kazganî Sadi mahallesinde sâkine sâhibe-i arzuhâl mu‘arrefetü’z-zât Şerife Fâtıma bt. es-Seyyid Mehmed nâm hatun İstanbul Bâb Mahkemesi’nde meclis-i şer‘-i münîrde zevc-i mutallıkı derûn-ı arzuhâlde mezkûrü’l-ism Ömer Ağa b. İsa nâm kimesne muvâcehesinde mezbûr Ömer Ağa iki minder ve iki müsta‘mel mak‘ad ve sekiz müsta‘mel basma yasdık ve bir müsta‘mel keçe mehr-i mu‘accel ve yüz bir guruş mehr-i müeccel tesmiyeleriyle zevc-i dâhilim iken târîh-i i‘lâmdan bir ay mukaddem beni tatlîk etmekle mezbûrun zimmetinde mütekarrir mehr-i müeccel-i mezkûrum olan yüz bir guruşu hâlâ bana edâya tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i muharrer üzere olduğunu ikrâr ü i‘tirâf etmeğin mûcebince mehr-i müeccel-i mezkûrum yüz bir guruşu hâlâ ve eşyâ-i mezkûreyi dahi aynen zevcesi müdde‘iyye-i mezbûre Şerife Fâtıma Hatun’a edâ ve teslîme mezbûr Ömer Ağa’ya tenbîh olunduğu huzûr-ı [âlîlerine i‘lâm olundu] Fî 13 Zilka‘de sene [12]55