Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 220 Hüküm no: 296 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andon’un Mühtedi Yusuf’a açtığı alacak davasından vazgeçip zimmet ibrası yaptığı Da‘vâsından meccânen ibrâ Ma‘rûz Rüesâ-yı sefâinden arzuhâl eden Andon v. Kiryako nâm zimmî İstanbul Bâb Mahkemesi’nde meclis-i şer‘de derûn-ı arzuhâlde ismi mezkûr Mühtedî Yusuf b. Abdullah nâm kimesne muvâcehesinde mezbûrun zimmetinde bundan akdem mâlımdan ve yedimden iktirâz ve kabz ve umûruna sarfla istihlâk eylediği elli guruş ve semen-i mebî‘den yüz altmış beş guruş ki cem‘an iki yüz on beş guruş alacak hakkım olmağla meblağ-ı mecmû‘-ı mezkûru merkūm Yusuf’dan hâlâ taleb ederim deyü da‘vâ ettikde ol dahi cevâbında külliyen inkârından mâ‘adâ benim senin zimmetinde cihet-i deyn-i şer‘îden üç yüz guruş hakkım olmağla meblağ-ı mezkûru taleb ederim deyü inkârıma mukārin benden da‘vâ ve ol vechile beynimizde ba‘de vukū‘i’l-münâza‘a muslihûn tavassutuyla beynimiz te’lîf ve tanzîm olunup tarafeynden her birimiz tasdîk eylediğimiz da‘vâ-yı mezkûremizden bi’t-terâzî meccânen fâriğler olmamızla bi’l-cümle husûs-ı mezkûra [39-b] müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik deyü ikrâr ve tasdîkleri tescîl ve huzûr-ı [âlîlerine i‘lâm olundu] Fî 20 Zilka‘de sene [12]55