Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 221 Hüküm no: 298 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pirinççi Süleyman’ın Bakkal Yuvan’a açtığı alacak davasını ispat edemediği Mu‘ârazadan men‘ Ma‘rûz Pirinççi es-Seyyid Süleyman b. Mustafa nâm kimesne İstanbul Bâb Mahkemesi’nde meclis-i şer‘de Bakkāl Yuvan v. Dimitri nâm zimmî muvâcehesinde mersûm Yuvan zimmî zimmetinde mâlımdan ve yedimden iştirâ ve kabz eylediği beher kıyyesi doksan ikişer paraya olarak iki yüz iki karye [kıyye] pirinç semeninden dört yüz altmış dört guruş yirmi dört paradan bâkī yüz elli sekiz guruş alacak hakkım olmağla meblağ-ı bâkī-i mezkûr yüz elli sekiz guruşu mersûm Yuvan zimmîden taleb ederim deyü ba‘de’d-da‘vâ ve’l-inkâr müdde‘î-i merkūm ber-vech-i muharrer müdde‘âsına ikāmet-i beyyine edemeyip tahlîfe dahi tâlib olmamağın mûcebince müdde‘î-i merkūm es-Seyyid Süleyman da‘vâ-yı mezkûresiyle mersûm Yuvan zimmîye bilâ-beyyine mu‘ârazadan men‘ olunduğu mübâşirleri Bâb-ı Seraskerî kavaslarından Kasımpaşalı Ali Kavas kulları yediyle huzûr-ı [âlîlerine i‘lâm olundu] Fî 29 Zilka‘de sene 1255