Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 222 Hüküm no: 299 Orijinal metin no: [39b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şalcı Hüseyin Ağa’nın Ali Ağa’ya sattığı tarla, ev ve samanlığa müdahale etmemek üzere taahhütte bulunduğu Tarla nizâ‘ı Ma‘rûz Anadolu’da Ankara sancağında Yabanâbâd kazâsına tâbi‘ Berçin nâhiyesi kurâlarından Gebeler nâm karye ahâlîsinden Ali Ağa b. Ali nâm kimesne İstanbul Bâb Mahkemesi’nde meclis-i şer‘-i münîrde karye-i mezkûre ahâlîsinden İsa oğlu Şalcı Hüseyin Ağa b. Halil nâm kimesne muvâcehesinde mezbûr Hüseyin Ağa’nın ammi oğlunun oğlu Mustafa b. Osman hâzır olduğu hâlde karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd bir bâb menzil arsasıyla bir samanhâne hâzır-ı mezbûr Mustafa’nın müstakıllen yedinde mülk ve hakkı ve yine karye-i mezbûre <> sınırı dâhilinde vâki‘ mevâzi‘-i adîdede kâin ma‘lûmü’l-hudûd ve’l-kıt‘a tarlalar ve karye-i mezbûre civârında Yayalar karye pîş-gâhında kâin kezâlik ma‘lûmü’l-hudûd bir kıt‘a çayır yeri dahi bâ-tapu müstakıllen taht-ı tasarrufumda iken hâzır-ı mezbûr Mustafa târîh-i i‘lâmdan bir sene mukaddem İstanbul’da Mahmudpaşa Mahkemesi’nde huzûr-ı hâkimü’ş-şer‘de zikr olunan menzil arsasıyla samanhâneyi bi-safkatin vâhidetin yüz elli beş guruş semen-i medfû‘ ve makbûza bana bey‘ ü temlîk ve zikr olunan çayır ve arazileri dahi üç yüz seksen guruş bedel-i makbûz-ı müstehlek mukābelesinde bana ferâğ ve tefvîz ve her birini mahallerinde kabza taslît eylediğinde ben dahi ber-vech-i muharrer iştirâ ve temellük ve tefevvüz ve kabûl eylediğimden sonra ba‘dehu zikirleri sebkat eden menzil ve samanhâne ve çayır ve tarlaları mahâllinde zabt <> ü tasarruf murâd eylediğimde mezbûr Hüseyin Ağa kendi emlâkı olmak zu‘muyla li-ebeveyn er karındaşı gāib ani’l-beled Halil nâm kimesneyi tarafından tevkîl birle benim zabt ü tasarrufuma bî-vech mümâna‘at olmağla suâl olunup vâki‘ olan mümâna‘atı men‘ ü def‘ olunmak murâdımdır deyü da‘vâya tasaddî eylemişidim el-hâletü hâzihî mezbûr Hüseyin Ağa zikr olunan menzil ve samanhâne ve çayır ve tarlahâda kat‘an alâkası olmadığını huzûr-ı şer‘de ikrâr ve fîmâ-ba‘d müdâhale ve ta‘arruz etmemek üzere ta‘ahhüd edip ben dahi ta‘ahhüdünü kabûl ve bu vechile kat‘-ı münâza‘a eyledik deyü ikrâr ve tasdîkleri huzûr-ı [âlîlerine i‘lâm olundu] Mustafa Kavas Fî 19 Zilka‘de sene [12]55