|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 114 Hüküm no: 95 Orijinal metin no: [20b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Sonisa kazası Komlos köyü mâlikânesi vakfı tasarrufunun Seyyid Süleyman’dan alınarak ilk sahibi Seyyid Ahmed ile kardeşi Seyyid Mehmed’e verilmesi
Ma‘rûz,
Sâdır olan fermân-ı âlîlerine imtisâlen işbu istid‘â ve derkenâra nazar olundukda Sivas sancağında Sonisa kazâsında vâki‘ Komlos? karyesi mâlikânesi vakfının evlâdiyet ve meşrûtiyet üzere bâ-berât-ı âlî mutasarrıf olan sahib-i arzuhâl es-Seyyid Ahmed hâl-i hayatda olup dahl ve ta‘arruz îcâb etmez iken fevt oldu diyerek hilâf-ı vâki‘ bir-takrîb nısf hisse mâlikâne-i mezbûreyi kendüye tevcîh ettiren derûn-ı derkenârda mezkûrü’l-ism es-Seyyid Süleyman nâm kimesne sahib-i arzuhâl es-Seyyid Ahmed’e gadr-i küllî olduğundan bahisle merkūm es-Seyyid Süleyman’ın ref‘inden kemâ-fi’s-sâbık tevcîh olunmasını sahib-i arzuhâl es-Seyyid Ahmed dâ‘îleri işbu arzuhâliyle istid‘â eder, fi’l-hakīka nısf mâlikâne-i mezbûr es-Seyyid Ahmed’in mahlûlünden 48 senesi L 16 günü kazâ-i mezbûr nâibi es-Seyyid Ali Rüşdü Efendi’den aldığı bir kıt‘a arz mûcebince merkūm es-Seyyid Süleyman b. es-Seyyid Ahmed’e tevcîh olunduğu derkenârdan müstebân ve sahib-i arzuhâl es-Seyyid Ahmed hâl-i hayatda kemâl-i sıhhatde olduğu ve nısf hisse-i mezkûreyi mutasarrıf idiği kazâ-i mezbûr ahâlîsinden Der-aliyye’de müsâfiren sâkinler Hasan b. Ali ve Mehmed b. Halil nâm mevsûku’l-kelim kimesnelerin alâ-tarîkı’ş-şehâde haber vermeleriyle hâl-i hayatda ve kemâl-i sıhhatde olduğu zâhir ve nümâyân olmağın bu sûretde nısf hisse-i mâlikâne-i mezbûr merkūm es-Seyyid Süleyman’ın ref‘inden sahib-i evveli es-Seyyid Ahmed’e ve karındaşı es-Seyyid Mehmed ibney Osman nâm karındaşlara ber-vech-i istid‘â tevcîh ve yedlerine berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine.
Sene [12]49
|