Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 223 Hüküm no: 300 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Yani’nin alacak iddiasıyla İbrahim Efendi’ye açtığı davada sulh olduğu 50 guruşa sulh [Ma‘rûz] Arzuhâl eden Kasab Yani v. Zelyo nâm zimmî İstanbul Bâb Mahkemesi’nde meclis-i şer‘de derûn-ı arzuhâlde mezkûrü’l-ism İbrahim Efendi b. Ahmed sulbî oğlu ve tarafından husûs-ı âti’l-beyânda vekîl olduğu Abdullah Ağa b. Mehmed ve Halil Ağa b. Mehmed şehâdetleriyle ber-nehc-i şer‘î sâbit olan Ahmed Efendi muvâcehesinde müvekkil-i mezbûr İbrahim Efendi zimmetinde târîh-i i‘lâmdan dört sene mukaddem mâlımdan ve yedimden iştirâ ve kabz eylediği ma‘lûmü’r-re’s ve’l-aded ağnâm esmânından sekiz yüz seksen yedi buçuk guruş alacak hakkım olmağla meblağ-ı mezbûru müvekkilim mezbûrdan hâlâ taleb ederim deyü tasaddî eylediğim da‘vâmdan bâ-tavassut-ı muslihîn müvekkil-i merkūm ile bi’t-tav‘ ve’r-rızâ elli guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve işbu târîhe gelince sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini <> bi’l-asâle ve bi’l-vekâle ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr elli guruşu mersûm Yani zimmîye edâ ve teslîme müvekkilim merkūm İbrahim Efendi’ye izâfetle vekîl-i merkūm Ahmed Efendi’ye tenbîh olunduğu huzûr-ı [âlîlerine i‘lâm olundu] Fî 27 Zilka‘de sene [1]255