|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 115 Hüküm no: 96 Orijinal metin no: [20b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Kayseri’deki Suyakanmış Hatun Evkafı mütevellilerine karşı Ayşe Hatun tarafından açılan davaların dikkate alınmaması
Ma‘rûz,
Sâdır olan fermân-ı âlîlerine imtisâlen meâl-i arz ve derkenâra nazar olundukda derûn-ı arzda mezkûrü’l-ism Âişe Hatun medîne-i Kayseriye’de vâki‘ Suyakanmış Hatun Evkāfı’nın evlâdiyet ve meşrûtiyet üzere mütevellîsi olanlar ile mahâllinde huzûr-ı şer‘de bundan akdem üç def‘a batn-ı evvel iddi‘âsıyla terâfu‘-i şer‘-i şerîf olup mezbûrenin herbir da‘vâya tesâddî eylediğinde iddi‘âsına mutâbık beyyine taleb olundukda herbirinde ityân-ı beyyineden izhâr-ı acz edip bî-vech mu‘ârazadan men‘ u def‘ olunduğunu müş‘ir vakf-ı mezkûrun mütevellîleri tarafına üç kıt‘a hüccet-i şer‘iye verildikden sonra mezbûre Âişe Hatun bu def‘a dahi yine batn-ı evvel iddi‘âsıyla da‘vâya tesâddî li-ecli’l-itmînân tekrar beyyineye havâle olunup ba‘de’l-imhâl ve’l-istimhâl kezâlik ityân-ı beyyineden izhâr-ı acz eylediğinden tekrar mu‘ârazadan men‘ olunmuş ise de bu vechile merkūme Âişe Hatun’un da‘vâsı ancak garaz ve ızrâr kasdıyla da‘vâ-yı mezkûresinde şerîre ve müzevvire olduğu mahâllinde lede’ş-şer‘i’l-enver zâhir ve bedîdâr olup mukaddem ve muahhar taraf-ı şer‘den verilen hüccet-i şer‘iyeler mûcebince fîmâ-ba‘d mezbûre Âişe’nin da‘vâsına iltifât olunmamak için kat‘iyyü’l-müfâd bâlâsı tuğrâ-yı garrâ ile mu‘anven bir kıt‘a emr-i âlî istid‘âsında olduklarını medîne-i Kayseriye nâibi Çarşenbevîzâde es-Seyyid Mehmed Said Efendi dâ‘îlerinin işbu mührü mutâbık arzı meâlinden müstefâd olmağın bu sûretde husûs-ı mezkûr için 1190 târihinde sudûr eden fermân-ı âlî müeyyed merkūme Âişe Hatun’un dahi bilâ-beyyine da‘vâsına iltifât olunmayıp bî-vech-i şer‘î müdâhalesin def‘ olunmak bâbında bâlâsı tuğrâ-yı garrâ ile mu‘anven bir kıt‘a fermân-ı celîlü’l-unvân sudûru iktizâ eylediği huzûr-ı âlîlerine i‘lâm olundu.
Sene [12]49
|