Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 228 Hüküm no: 309 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’nın vefat eden hanımı Ayşe Hatun’un terekesinden çocukları Ayşe ve Hatice’nin hisselerini ödemesi 280 guruşa sulh [Ma‘rûz] Medîne-i Hazret-i Ebâ Eyyûbe’l-Ensârî -radiye anhu Rabbihi’l-bârî- mahâllâtından Takyeciler mahallesinde sâkine iken bundan akdem vefât eden Âişe Hatun bt. Abdullah’ın verâseti zevc-i metrûku Osman b. Ali ile sadrı kebîr oğulları Mustafa ve Mehmed ve sadriye kebîre kızları Âişe ve Hadice hatunlara münhasıra olduğu lede’ş-şer‘i’l-enver zâhir ve mütehakkık oldukdan sonra verese-i mezbûrûndan zâtları mu‘arrefe Âişe ve Hadice hatunlar İstanbul Bâb Mahkemesi’nde meclis-i şer‘de tereke-i müteveffât-ı mezbûreye bi’l-verâse vaz‘-ı yedi mütehakkık olan zevc-i merkūm Osman muvâcehesinde mûrisimiz müteveffât-ı mezbûrenin hîn-i vefâtında yanında mevcûd terekesinden olarak bizim hisse-i irsiyemize isâbet eden mecmû‘u üç yüz elli guruş kıymetli on aded nühâs sahan ve sekiz aded tencere ve iki nühâs güğüm ve iki nühâs maşraba ve iki nühâs tas ve bir ta‘âm sinisini pederimiz mezbûr Osman Ağa fuzûlî ahz ve âhara bey‘le istihlâk etmekle kıymetleri olan meblağ-ı mezkûr üç yüz elli guruşu pederimiz mezbûr Osman’dan bi’l-verâse tazmîn taleb ederim [ederiz] deyü tasaddî eylediğimiz da‘vâmızdan bâ-tavassut-ı muslihîn merkūm Osman ile bi’t-tav‘ ve’r-rızâ iki yüz seksen guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âmıza ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr iki yüz seksen guruşun müdde‘iyyetân-ı mezbûretân Âişe ve Hadice hatunlara edâya mezbûr Osman’a tenbîh olunduğu mübâşirleri Bâb-ı Seraskerî kavaslarından Yüzbaşı İsmail Kavas kulları yediyle huzûr-ı [âlîlerine i‘lâm olundu] Fî 25 Zilka‘de sene [12]55