Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 230 Hüküm no: 311 Orijinal metin no: [41a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hanım’ın Hediyetullah Hatun’da olan eşyalarının iadesi ile İsmail Ağa’da olan alacağının ödenmesi 350 guruş hüküm Ma‘rûz İstanbul’da Çarşambapazarı kurbünde Beyceğiz mahallesinde sâkine sâhibe-i arzuhâl Fâtıma bt. Şükrü nâm hatunun yeğeni ve tarafından husûs-ı âtîde vekîl olduğu zâtını ârifân es-Seyyid Mehmed Efendi b. Mustafa ve es-Seyyid Abdullah Efendi b. Mustafa nâm kimesneler şehâdetleriyle ber-nehc-i şer‘î sâbit olan Mustafa b. Mehmed nâm kimesne İstanbul Bâb Mahkemesi’nde meclis-i şer‘de derûn-ı arzuhâlde mezkûretü’l-ism mu‘arrefetü’z-zât Hediyetullah bt. İsmail nâm hatun muvâcehesinde kezâlik derûn-ı arzuhâlde ismi mezkûr İsmail Ağa b. Ömer nâm kimesne hâzır olduğu hâlde müvekkilem merkūme Fâtıma Hatun bundan akdem mâlımdan [mâlından] merkūme Hediyetullah Hatun yedine li-ecli’l-hıfz îdâ‘ ve teslîm eylediği bir hilâlî köhne sâ‘at ve bir elmas iğne ve bir çift elmas küpe ve bir elmas yüzük ve iki köhne döşek ve iki yorgan ma‘a çârşeb ve iki yatak çârşebi ve yün memlû üç minder ve on çatma yasdık ve üç çuka mak‘ad ve bir tahta sandık ve bir sepet sandık ve bir ceviz çekmece ve bir mir‘ât ve bir köhne ferâce ve bir baş yemenî ve bir dolap ve hoşâb kâse[si] ve bir et tahtası ve bir yorgan anbarı ve bir nühâs kürek ve bir satır ve bir balta ve üç duhân tablası ve bir biber değirmeni ve üç şamdan ve bir kahve değirmeni ve iki cezbe ve iki kahve güğümü ve iki sagīr sahan [41b] ma‘a kapak ve sekiz sahan [ve] bir güğüm ve bir câmeşûy tanceresi ve on tencere ve bir nühâs mangal ve bir sagīr tencere ve bir câmeşûy leğeni ve iki leğen ma‘a ibrik ve bir kebîr sini ve iki sagīr tepsi ve bir tas ve bir süzgeç ve bir hoşâb kefçesi ve on bir tombak zarf bi-a‘yânihâ mezbûre Hediyetullah Hatun yedinde mevcûde olmağla eşyâ-i muharrere-i mezkûreyi müvekkilem mezbûre için bana teslîme ve yine müvekkilem mezbûrenin hâzır-ı merkūm zimmetinde cihet-i karzdan alacak hakkı olan dokuz yüz kırk guruşdan bâkī üç yüz elli guruşu dahi hâzır-ı merkūm kezâlik müvekkilem mezbûre için bana edâya mezbûre Hediyetullah Hatun ile hâzır-ı mezbûrdan her birine tenbîh olunmak bi’l-vekâle matlûbumdur deyü da‘vâ ettikde mezbûre Hediyetullah Hatun ile hâzır-ı mezbûrdan her biri kaziyye minvâl-i meşrûh üzere olduğunu ikrâr ü i‘tirâf ve eşyâ-i muharrere-i mezkûre ile meblağ-ı bâkī-i mezkûr üç yüz elli guruşu müvekkile-i merkūme için vekîl-i merkūma edâ ve teslîme merkūme Hediyetullah Hatun ile hâzır-ı merkūmdan her biri müte‘ahhid oldukları huzûr-ı [âlîlerine i‘lâm olundu] Fî 24 Şevvâl sene [12]55