Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 233 Hüküm no: 316 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neccar kalfası Yorgi’nin Tuğlacı Abraham’a olan borcunu ödemesi 500 guruş hüküm Ma‘rûz Arzuhâl eden Tuğlacı Abraham v. Kasper nâm zimmî İstanbul Bâb Mahkemesi’nde meclis-i şer‘de neccâr kalfalarından Yorgi v. Anaştaş nâm zimmî muvâcehesinde mersûm Yorgi zimmî zimmetinde bin iki yüz elli üç senesi şehr-i Ramazani’l-mübârekinin on dördüncü günü mâlımdan ve yedimden istidâne ve kabz ve istihlâk eylediği beş yüz guruş deyni mukābelesinde mâlından altın üzerine masnû‘ dokuz aded elmas taşlı bir dal(?) yüzüğünü yedime rehin vaz‘ ü teslîm etmişidi el-hâletü hâzihî meblağ-ı mezkûr beş yüz guruşu bana edâ birle rehn-i mezkûru rehniyetden fekk ü tahlîse mersûm Yorgi zimmîye tenbîh <> olunmak matlûbumdur deyü da‘vâ ettikde ol dahi cevâbında kaziyye minvâl-i muharrer üzere olduğunu tâyi‘an ve kat‘iyyen ikrâr ü i‘tirâf etmeğin mûcebince meblağ-ı mezkûr beş yüz guruşu müdde‘î-i mersûm Abraham zimmîye edâ birle rehn-i mezkûru fekk ü tahlîse mersûm Yorgi zimmîye tenbîh olunduğu huzûr-ı [âlîlerine i‘lâm olundu] Fî 7 Zilhicce sene [12]55