Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 234 Hüküm no: 318 Orijinal metin no: [42a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avram zimmînin saatini aldığı iddiasıyla bedelinin veya saatinin geri verilmesi talebiyle Kosti’ye açtığı davayı ispat edemediği 400 guruş kıymetli sâ‘atden mu‘ârazadan men‘ Ma‘rûz Bâ‘is-i i‘lâm Avram v. Yasef nâm Yahûdi İstanbul Bâb Mahkemesi’nde meclis-i şer‘de francalacı tablakârı Kosti v. Mihal nâm zimmî muvâcehesinde işbu târîh-i i‘lâmdan bir gün mukaddem İstanbul’da Kapan-ı Dakīk kapısı hâricinde mesfûr Kosti zimmîden francala iştirâ eder iken koynumda mevcûd dört yüz seksen guruş kıymetli bir aded İngiliz koyun sâ‘atim mersûmun küfesine düşüp mersûm Kosti zimmî dahi fuzûlî ve bi-gayri hakkın hufyeten ahzetmekle mevcûd ise aynını müstehlek ise bi’s-sübût kıymet-i mezkûresi olan dört yüz seksen guruşu mersûm Kosti zimmîden damânen taleb ederim deyü ba‘de’d-da‘vâ ve’l-inkâr müdde‘î-i mersûm Avram Yahûdi ber-vech-i muharrer müdde‘âsına ikāmet-i beyyine edemeyip bi’t-taleb mesfûr Kosti zimmî bi’l-muvâcehe vech-i şer‘î üzere tahlîf olunmağın mûcebince müdde‘î-i mesfûr Avram Yahûdi da‘vâ-yı mezkûresiyle mesfûr Kosti zimmî[ye] bî-vech-i şer‘î mu‘ârazadan men‘ olunduğu huzûr-ı [âlîlerine i‘lâm olundu] Fî 4 Zilhicce sene [12]55