|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 116 Hüküm no: 97 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Sivas’daki Selman Bey ve İsmail Bey mescidlerinde cüz ve mevlîd okunmak üzere Ser-bostaniyan-ı hâssa Mehmed Ağa tarafından vakfedilen yerlerin mütevellilerinden Seyyid Alâaddin Bey’in vefatıyla hissesinin oğullarına verilmesi
Ma‘rûz,
Sâdır olan fermân-ı âlîlerine imtisâlen medîne-i Sivas nâibi Müftizâde es-Seyyid Ahmed Efendi’nin mührü mutâbık işbu arzıyla derkenârlara nazar olundukda medîne-i mezbûrede vâki‘ Selman Bey ve Hacı İsmail Bey mescid-i şerîfinde kırâet-i eczâ-i şerîf ve tâlî-i mevlûdü’n-Nebi için sâbıkā Ser-bostânîyân-ı hâssa merhûm Mehmed Ağa’nın medîne-i mezbûrede Gökmedresesi mahallesi tarafında kâin kârgir hamam ve Penbeciler sûkunda bir bâb kök boyahâne dükkânı ve dekâkîn-i sâire vakfının vazîfe-i mu‘ayyene ile ber-vech-i meşrûta tevliyetinin on hisseden üç buçuk hisse es-Seyyid Mustafa Bey ve iki buçuk hissesi es-Seyyid Mehmed Celaleddin Bey ve birer hissesi es-Seyyid Alâaddin ve es-Seyyid Numan Bey ve es-Seyyid Abdi Bey ve es-Seyyid Ahmed Bey nâm kimesnelerin iki kıt‘a berat-ı âlîşân ile uhdelerinde olduğu ve merkūm es-Seyyid Alâaddin Bey bu def‘a fevt olup mahlûlünden bir hisse tevliyet-i mezkûre vazîfe-i mu‘ayyenesiyle sulbî oğulları es-Seyyid Mehmed Celaleddin Bey ve es-Seyyid Mehmed Bey ve es-Seyyid İbrahim Bey ve es-Seyyid İsmail Bey ve es-Seyyid Mehmed Bahaaddin Bey ve es-Seyyid Ali Bey müteveffâ-yı merkūm es-Seyyid Alâaddin Bey’in sulbî oğulları ve umûr-ı vakfı rü’yete a‘lem olup bir hisse tevliyet-i mezkûre ber-mûceb-i te‘âmül-i kadîm mezbûrûn es-Seyyid Mehmed Celaleddin Bey ve es-Seyyid Mehmed Bey ve es-Seyyid İbrahim Bey ve es-Seyyid İsmail Bey ve es-Seyyid Mehmed Bahaaddin Bey ve es-Seyyid Ali Bey kullarına ale’l-iştirâki’s-seviy tevcîhi iktizâ eylediğini kazâ-i mezbûr ahâlîsinden Der-aliyye’de müsâfiren sâkinler Neriman b. Abdullah ve İbrahim b. Abdullah nâm kimesneler alâ-tarîkı’ş-şehâde haber vermeleriyle on hisseden bir hisse tevliyet-i mezkûre vazîfe-i mu‘ayyenesiyle müteveffâ-yı mezbûr es-Seyyid Alâaddin Bey’in mahlûlünden ber-mûceb-i şart-ı vâkıf ve amel-i kadîm sulbî oğulları mezbûrûn es-Seyyid Mehmed Celaleddin Bey ve es-Seyyid Mehmed Bey ve es-Seyyid Mehmed [İbrahim] Bey ve es-Seyyid İsmail Bey ve es-Seyyid Mehmed Bahaaddin Bey ve es-Seyyid Ali Bey kullarına seviyen tevcîh ve yedlerine berat-ı şerîf-i âlîşân inâyet ve ihsân buyurulmak iktizâ eylediği huzûr-ı âlîlerine i‘lâm olundu.
Fî 5 Ra sene [12]49
|