Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 235 Hüküm no: 320 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Petro ile Manol’un birbirlerinde olan alacak ve rehin eşya iadesi davasından vazgeçtikleri 800 guruş ibrâ Ma‘rûz Derûn-ı arzuhâlde mastûrü’l-ism Petro v. Kosti nâm zimmî İstanbul Bâb Mahkemesi’nde meclis-i şer‘de arzuhâl eden Manol v. Keçko? zimmî muvâcehesinde mersûm Manol zimmî zimmetinde bundan akdem mâlımdan ve yedimden iktirâz ve kabz eylediği yüz seksen guruş alacak hakkım olmağla meblağ-ı mezkûru mersûm Manol zimmîden hâlâ taleb ederim deyü da‘vâ eylediğimde ol dahi cevâbında ikrâr lâkin ben meblağ-ı mezkûr mukābelesinde mâlımdan beş yüz guruş kıymetli altın üzerine masnû‘ bir çift elmas küpe ve yüz elli guruş kıymetli bir elmas yüzük ve yine yüz elli guruş kıymetli bir canfes fistanımı yedine rehin vaz‘ ve teslîm etmişidim deyü inkârına mukārin benden da‘vâ ve ol vechile beynimizde <> ba‘de vukū‘i’l-münâza‘a muslihûn tavassutuyla beynimiz tesviye ve tanzîm olunup tarafeynden her birimiz tasaddî eylediğimiz da‘vâ-yı mezkûrumuzdan meccânen fâriğler olmağın bi’l-cümle husûs-ı mezkûra müte‘allika âmme-i da‘vâdan tarafeynden hir birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri huzûr-ı [âlîlerine i‘lâm olundu] Fî 2 Zilhicce sene [12]55