Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 235 Hüküm no: 321 Orijinal metin no: [42b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fotini bt. Toma’nın Praşkova’da hizmet bedelinden kalan alacağından vazgeçtiği 900 guruşdan ibrâ Ma‘rûz Mahrûse-i Galata hâricinde Beyoğlu nâm mahâlde Sâiller mahallesinde mütemekkine sâhibe-i arzuhâl mu‘arrefetü’[z-zât]ş-şahs Fotini bt. Toma nâm Nasrâniye İstanbul Bâb Mahkemesi’nde meclis-i şer‘-i hatîrde Enderûn-ı hümâyûn hânendebaşısı derûn-ı arzuhâlde mastûrü’l-ism Yanko v. Dimitri nâm zimmî tarafından husûs-ı âti’l-beyânda vekîl olduğu Numan Ağa b. Mehmed ile Kayıkçı Lazari v. Ligonidi nâm zimmî şehâdetleriyle ber-nehc-i şer‘î sâbit olan Neccâr Sihboz v. Diyon? nâm zimmî muvâcehesinde ben bundan akdem müvekkil-i mersûmun talebiyle mahrûse-i mezbûrede Kemeraltı nâm mahâlde vâki‘ menzilinde anası gāibetü ani’l-meclis Praşkova bt. Manol nâm Nasrâniye beher şehr ellişer guruş ücret mukāvelesiyle sekiz sene hizmet ve ba‘dehu üç sene mukaddem müfârakat etmemle müddet-i mezkûrede ecr-i müsemmâm olan cem‘an dört bin sekiz yüz guruşun üç bin üç yüz guruşunu mukaddemâ müvekkil-i mersûm yediyle ve altı yüz guruşu dahi bu def‘a müvekkil-i mersûmun mâlından vekîl-i mersûm Sihboz? zimmî yediyle işbu meclis-i şer‘de kabz ve ol vechile cem‘an üç bin dokuz yüz guruşunu istîfâ etmemle bâkīsi olan dokuz yüz guruşa ve bi’l-cümle husûs-ı mezkûra müte‘allika âmme-i da‘vâdan müvekkil-i mersûm Yanko zimmî ile anası gāibe-i mesfûrenin zimmetlerini ibrâ-i âmm-ı sahîh-i şer‘î ile kabûllerini hâvî ibrâ ve iskāt eyledim deyü ikrâr ve tasdîkleri tescîl ve huzûr-ı [âlîlerine i‘lâm olundu] Fî 24 Zilka‘de sene [12]55