Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 236 Hüküm no: 322 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenneci Mahmud Ağa’nın Ayşe Hatun’a açtığı alacak davada sulh olduğu 150 guruşa sulh Ma‘rûz Zenneci esnâfından sâhib-i arzuhâl el-Hâc Mahmud Ağa b. Sadullah nâm kimesne İstanbul Bâb Mahkemesi’nde meclis-i şer‘-i münîrde derûn-ı arzuhâlde mezkûretü’l-ism mu‘arrefetü’z-zât Âişe bt. Hüseyin nâm hatun muvâcehesinde mezbûre Âişe Hatun zimmetinde semen-i mebî‘den ba‘de külli’l-hesâb sahhu’l-bâkī dört yüz yirmi guruş alacak hakkım olmağla meblağ-ı mezkûru mezbûre Âişe Hatun’dan hâlâ taleb ederim deyü tasaddî eylediğim da‘vâmdan bâ-tavassut-ı muslihîn mezbûre Âişe Hatun ile bi’t-tav‘ ve’r-rızâ yüz elli guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr yüz elli guruşun müdde‘î-i merkūm el-Hâc Mahmud Ağa’ya edâsıyla mezbûre Âişe Hatun ilzâm olunduğu tescîl ve huzûr-ı [âlîlerine i‘lâm olundu] Fî-selhi Şevvâl sene 1255