Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 237 Hüküm no: 323 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Nuri Ağa’nın çocuklarının nafaka bedelinden kalan borcunu boşandığı hanımı Şerife Emine Hatun’a ödemesi 370 guruşa hüküm Ma‘rûz Derûn-ı arzuhâlde mezkûretü’l-ism Şerife Emine bt. es-Seyyid İbrahim nâm hatunun kayın vâlidesi ve tarafından husûs-ı âti’l-beyânda vekîl olduğu zât-ı mezbûreyi ârifân Salih Ağa b. İbrahim ve Ahmed b. Ahmed şehâdetleriyle vech-i şer‘î üzere sâbit olan mu‘arrefetü’z-zât Zeliha bt. Mehmed nâm hatun İstanbul Bâb Mahkemesi’nde meclis-i şer‘-i münîrde müvekkile-i merkūmenin zevc-i sâbıkı sâhib-i arzuhâl Mehmed Nuri Ağa b. Ahmed nâm kimesne muvâcehesinde müvekkilem merkūmenin mezbûr Mehmed Nuri Ağa ile mukaddemâ zevciyyet beynlerinde kāime iken mezbûrun firâşından hâsıllar ve müvekkilem mezbûreden mütevellidler ve bi-hakkı’l-hıdâne hacr ü terbiyesinde olan sulbî oğlu es-Seyyid Mehmed ve sulbiye kızı Şerife Behiye nâm sagīrânın bâ-hüccet-i şer‘iyye nafaka-i mukaddere-i mefrûza-i müstedânelerinden bin iki yüz elli beş senesi Şa‘bânü’l-mu‘azzamının altıncı gününden işbu târîhe gelince şehriye kırkar guruşdan mezbûr Mehmed Nuri Ağa zimmetinde müctemi‘ bin seksen guruşdan bâkī üç yüz yetmiş guruş müvekkilem mezbûrenin alacak hakkı olmağla meblağ-ı bâkī-i mezkûru mezbûr Mehmed Nuri’den bi’l-vekâle hâlâ taleb ederim deyü ba‘de’d-da‘vâ ve’l-ikrâr mûcebince meblağ-ı bâkī-i mezkûr üç yüz yetmiş guruşun müvekkile-i merkūme için vekîl-i mezbûre Zeliha Hatun’a edâsıyla mezbûr Mehmed Nuri Ağa ilzâm olunduğu huzûr-ı [âlîlerine i‘lâm olundu] Fî-gurreti Zilhicce sene [12]55