Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 239 Hüküm no: 327 Orijinal metin no: [43b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papasoğlu Ananya’dan nakliye bedelinden usulsüz şekilde para alan Katırcı Hasan’ın parayı iade etmesi 552 guruş hüküm Ma‘rûz Anadolu’da medîne-i Konya sancağında Sille kazâsı re‘âyâsından Papasoğlu Ananya v. Papa Sefero nâm zimmî İstanbul Bâb Mahkemesi’nde meclis-i şer‘-i hatîrde Katırcı Hasan b. Hüseyin nâm kimesne muvâcehesinde bundan akdem Mudanya kazâsında mevcûd mâlım olan ma‘lûmü’l-vezn çekirdek kahvemi kazâ-i mezbûrdan medîne-i merkūmeye götürmek içün beher vakiyyesine otuz beşer para kirâ tesmiyesiyle merkūmun mâlı olan dokuz re’s katırlarını istîcâr ve tahmîl birle medîne-i mezbûre cânibine isrâ edip esnâ-i tarîkde Eskişehir kazâsında [vu]sûlünde zikr olunan kahveyi âhara bey‘ ile tebdîl ve yerine ol mikdâr pirinç iştirâ eylediğimden sonra merkūm Hasan mâlımdan bi-gayri hakkın ziyâde beş yüz elli iki guruşumu ahz u kabz etmekle meblağ-ı mezkûr beş yüz elli iki guruşu merkūm Ahmed’den istirdâd ederim deyü da‘vâ ettikde ol dahi cevâbında ber-vech-i muharrer ikrâr ü i‘tirâf lâkin mücerred müdde‘î-i mezbûr zikr olunan Eskişehir kazâsında pirince tebdîl etmekle ol vechile ben ber-vech-i muharrer mukāveleme nâdim ve peşîmân olmağla öyle olacak meblağ-ı mezkûr beş yüz elli iki buçuk guruş zikr olunan katırları ziyâde kirâlarına takās ve mahsûb olunsun deyü takrîr-i meşrûhu üzere tasaddî eylediği da‘vâsı def‘e sâlih cevâb-ı şer‘î olmadığı kendiye tefhîm ve da‘vâ-yı mezkûresiyle mersûm Ananya zimmîye bî-vech-i şer‘î mu‘ârazadan ba‘de’l-men‘ merkūm Hasan’ın sâlifü’l-beyân ikrârıyla lâzım gelen meblağ-ı mezkûr beş yüz elli iki guruşu mersûm Ananya zimmîye redd ü teslîme merkūm Hasan’a tenbîh olunduğu huzûr-ı [âlîlerine i‘lâm olundu] Fî 2 Zilhicce sene [12]55