|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 117 Hüküm no: 98 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Sivas’daki Selman Bey ve el-Hâc İsmail Bey Vakfı mütevellilerinden Seyyid Mustafa Bey b. Seyyid Ahmed’in vefatıyla hissesinin oğlu Seyyid Selman Bey’e verilmesi
Ma‘rûz,
Sâdır olan fermân-ı âlîlerine imtisâlen medîne-i Sivas nâibi Müftizâde es-Seyyid Ahmed Efendi’nin mührü mutâbık işbu arzıyla derkenârlara nazar olundukda medîne-i mezbûrede vâki‘ Selman Bey nâm sahibü’l-hayrın vakfının vazîfe-i mu‘ayyene ile ber-vech-i meşrût tevliyetinin rub‘ hissesi es-Seyyid Mustafa Bey b. el-merhûm es-Seyyid Ahmed Paşa’nın bâ-berât uhdesinde olduğu ve merkūm es-Seyyid Mustafa Bey bu def‘a fevt olup mahlûlünden Selman Bey Vakfı tevliyetinin üç hissesi ve el-Hâc İsmail Bey Vakfı tevliyetinin rub‘ hissesi vazîfe-i mu‘ayyeneleriyle sulbî oğlu es-Seyyid Selman Bey kulları üzerine tevcîh olunmak niyâzında olduğu arz-ı mezkûr meâlinden ve derkenârlardan müstebân ve merkūm es-Seyyid Selman Bey müteveffâ-yı mezbûr es-Seyyid Mustafa Bey[‘in] sulbî oğlu ve umûr-ı vakfı rü’yete olup sâlifü’z-zikr Selman Bey Vakfı tevliyetinin üç hissesi ve el-Hâc İsmail Bey Vakfı tevliyetinin rub‘ hissesi vazîfe-i mu‘ayyeneleriyle ber-mûceb-i te‘âmül-i kadîm mezbûr es-Seyyid Selman Bey kullarına tevcîhi iktizâ eylediği kazâ-i mezbûr ahâlîsinden Der-aliyye’de müsâfiren [sâ]kinler Neriman b. Abdullah ve İbrahim b. Abdullah nâm kimesneler alâ-tarîkı’ş-şehâde haber vermeleriye bu sûretde mârrü’l-beyân Selman Bey Vakfı tevliyetinin on hisseden üç hissesi ve el-Hâc İsmail Bey Vakfı tevliyetinin rub‘ hissesi vazîfe-i mu‘ayyeneleriyle müteveffâ-yı mezbûr es-Seyyid Mustafa Bey mahlûlünden ber-mûceb-i şart-ı vâkıf ve amel-i kadîm sulbî oğlu merkūm es-Seyyid Selman Bey kullarına tevcîh ve yedine berat-ı şerîf-i âlîşân inâyet ve ihsân buyurulmak iktizâ eylediği huzûr-ı âlîlerine [i‘lâm] olundu.
Fî 5 Ra sene [12]49
|