Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 240 Hüküm no: 329 Orijinal metin no: [43b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eleniko Nasraniyenin alacak iddiasıyla Andon zimmîye açtığı davada sulh oldukları Ücretden sulh 200 guruş Ma‘rûz İstanbul’da Sulumanastır kurbünde Hüseyinağa mahallesinde mütemekkine mu‘arrefetü’z-zât Eleniko bt. Yorgi nâm Nasrâniye İstanbul Bâb Mahkemesi’nde meclis-i şer‘-i hatîrde iplikçi tâifesinden Andon v. Andon nâm zimmî muvâcehesinde ben ücretle hizmet eder makūleden olmamla mersûm Andon zimmînin talebiyle İstanbul hısnı ebvâbından Balatkapısı dâhilinde Hammâmî Muhyiddin mahallesinde vâki‘ menzilinde mu‘tâd üzere ücret kavlinsiz otuz altı ay hizmet ve ba‘dehu müfârakat etmemle müddet-i mezkûrede müstahıkka olduğum ecr-i mislimi mersûm Andon zimmîden hâlâ taleb ederim deyü tasaddî eylediğim da‘vâmdan bâ-tavassut-ı muslihîn mersûm Andon zimmî ile kat‘an li’n-nizâ‘ bi’t-tav‘ ve’r-rızâ iki yüz guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde ecr-i misl mutâlebesine ve bi’l-cümle husûs-ı mezkûra ve işbu târîhe gelince sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr iki yüz guruşun müdde‘iyye-i mersûme Eleniko Nasrâniyeye edâ ve teslîmiyle mersûm Andon zimmî ilzâm olunduğu huzûr-ı [âlîlerine i‘lâm olundu] Fî 17 Zilka‘de sene [12]55