Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 241 Hüküm no: 330 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alanyalı Mahmud Efendi’nin alacak iddiasıyla Halil Ağa’ya açtığı davayı ispat edemediği 2000 guruş men‘ Ma‘rûz Alâiyeli Mahmud Efendi b. el-Hâc Ebubekir İstanbul Bâb Mahkemesi’nde meclis-i şer‘-i münîrde el-Hâc Halil Ağa b. Süleyman nâm kimesne muvâcehesinde <> ben bin iki yüz kırk altı senesi hilâlinde İstanbul’da Yenihan’da mütemekkin sarrâfım gāib ani’l-meclis İstefan oğlu Mıgırdıç v. ( ) zimmîye götür ver deyü mâlımdan altı bin guruşumu mezbûr el-Hâc Ali [Halil] Ağa’ya teslîm eylediğimde ol dahi ber-minvâl-i muharrer yedimden ahz ve meblağ-ı mezkûrun ancak dört bin guruş[unu] götürüp gāib-i mesfûr Mıgırdıç zimmîye teslîm edip bâkīsi olan iki bin guruşu bana vermeyip bi-gayri hakkın <> kendi umûruna sarfla istihlâk etmekle meblağ-ı bâkī-i mezkûru mezbûr el-Hâc Halil Ağa’dan tamâmen taleb ederim deyü ba‘de’d-da‘vâ <> ve’l-inkâr müdde‘î-i merkūm ber-vech-i muharrer müdde‘âsına ikāmet-i beyyine edemeyip bi’t-taleb mezbûr el-Hâc Halil Ağa bi’l-muvâcehe ber-nehc-i şer‘î tahlîf olunmağın mûcebince müdde‘î-i merkūm Mahmud Efendi da‘vâ-yı mezkûresiyle mezbûr el-Hâc Halil Ağa’ya bilâ-beyyine mu‘ârazadan men‘ olunduğu mübâşirleri Bâb-ı Seraskerî kavaslarından Gümüşhaneli İbrahim Kavas kulları yediyle huzûr-ı [âlîlerine i‘lâm olundu] Fî 7 Zilhicce sene 1255