Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 241 Hüküm no: 331 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa’nın boşandığı hanımı Emine Hatun’dan olan oğlu Hüseyin’i kayın validesi Fâtıma Hatun’a bakması için verdiği Sagīreyi kendi mâlından infâk etmek üzere ta‘ahhüd Ma‘rûz Mu‘arrefetü’z-zât Fâtıma bt. İbrahim nâm hatun İstanbul Bâb Mahkemesi’nde meclis-i şer‘-i münîrde mukaddemâ dâmadı Halil Ağa b. İsmail nâm kimesne sadriye kızım gāibetü ani’l-meclis Emine Hanım’ın mezbûr Halil Ağa ile mukaddemâ zevciyyet beynlerinde kāime iken mezbûrun firâşından hâsıl kızım gāibe-i mezbûreden mütevellid işbu hâzır bi’l-meclis sulbî oğlu Hüseyin nâm sagīr bi-hakkı’l-hıdâne hacr ü terbiyemde iken bundan akdem sagīr-i mezbûr yedi yaşını tekmîl ve kendiye istiğnâ hâsıl olduğuna binâen sagīr-i mezbûru babası merkūm benden mutâlebe ve ahz murâd etmişidi el-hâletü hâzihî merkūm Halil Ağa sagīr-i mezbûru rızâsıyla benim yanımda terk eylediğinde ben dahi mâlımdan infâk edip nafaka nâmıyla babası merkūmdan bir akçe ve bir habbe ve bir nesne mutâlebe etmemek üzere müte‘ahhid oldum deyü mukırra-ı mezbûrenin bi’l-cümle takrîr-i meşrûhunu mezbûr Halil’in tasdîk ve tahkīk eylediği mübâşirleri Bâb-ı Seraskerî kavaslarından Ali Kavas kulları yediyle huzûr-ı [âlîlerine i‘lâm olundu] Fî 2 Zilhicce sene 1255