Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 242 Hüküm no: 332 Orijinal metin no: [44a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Mehmed Sadullah Efendi’nin Halil Ağa’ya olan borcunu ödemesi <<1990 guruş>> 2191 guruş hüküm Ma‘rûz Sâhib-i arzuhâl Bezzâzistânî el-Hâc Halil Ağa b. Ali nâm kimesne İstanbul Bâb Mahkemesi’nde meclis-i şer‘-i münîrde derûn-ı arzuhâlde mezkûrü’l-ism eş-Şeyh Mehmed Sadullah Efendi b. Ahmed nâm kimesne muvâcehesinde merkūm Mehmed Sadullah Efendi zimmetinde yedimde olup işbu sene-i mübâreke şehr-i <> Ramazani’l-mübâreki gurresi târîhiyle müverrah bir kıt‘a temessük nâtık olduğu üzere li-ebeveyn er karındaşı gāib ani’l-meclis Hafız Edhem Efendi kefâletiyle mâlımdan ve yedimden iştirâ ve kabz eylediği eşyâ-i ma‘lûme semeninden alacağım olan iki bin dört yüz kırk bir guruşun iki yüz elli guruşunu mezbûr Mehmed Sadullah Efendi mukaddemâ bana edâ ve teslîm ben dahi yedinden ahz u kabz etmemle bâkīsi olan iki bin yüz doksan bir guruşu merkūm Mehmed Sadullah Efendi’den hâlâ taleb ederim deyü da‘vâ ettikde ol dahi cevâbında kaziyye minvâl-i muharrer üzere olduğunu bi-tamâmihi ikrâr ü i‘tirâf etmeğin mûcebince meblağ-ı bâkī-i mezkûr iki bin yüz doksan bir guruşun müdde‘î-i merkūm el-Hâc Halil Ağa’ya edâ ve teslîmiyle mezbûr Mehmed Sadullah Efendi ilzâm olunduğu huzûr-ı [âlîlerine i‘lâm olundu] Fî 29 Zilka‘de sene 1255