Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 242 Hüküm no: 333 Orijinal metin no: [44a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Hafize Hatun’un alacak talebiyle Mehmed Salih Efendi ile Ahmed Efendi’ye açtığı davada sulh olduğu 30 guruşa sulh Ma‘rûz Mahrûse-i Galata’ya muzâfe kasaba-i Kasımpaşa’da Başçı Hasanefendi mahallesinde sâkine sâhibe-i arzuhâl mu‘arrefetü’z-zât Şerife Hafize bt. es-Seyyid İbrahim nâm hatun İstanbul Bâb Mahkemesi’nde meclis-i şer‘de derûn-ı arzuhâlde isimleri mezkûr Mehmed Salih Efendi b. Osman ve es-Seyyid Ahmed Efendi b. Ömer nâm kimesneler muvâcehelerinde mezbûrân Mehmed Salih Efendi ve es-Seyyid Ahmed Efendi zimmetlerinde bundan akdem mâlımdan ve yedimden bi’l-ma‘iyye iştirâ ve kabz eyledikleri otuz altı dönüm taş semeninden iki yüz on guruş alacak hakkım olmağla meblağ-ı mezkûru mezbûrândan hâlâ taleb ederim deyü tasaddî eylediğim da‘vâmdan bâ-tavassut-ı muslihîn merkūmân ile bi’t-tav‘ ve’r-rızâ kat‘an li’n-nizâ‘ otuz guruş bedel-i medfû‘ ve makbûza ba‘de akdi’l-musâlaha ve’l-kabûl mâ‘adâya ve bi’l-cümle husûs-ı mezkûra müte‘allika da‘vâdan tarafeynden her birimiz âharın zimmetini kabûlü hâvî [44b] ibrâ ve iskāt eyledik deyü ikrâr ve tasdîkleri huzûr-ı [âlîlerine i‘lâm olundu] Fî 5 Zilhicce sene 1255