|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 117 Hüküm no: 99 Orijinal metin no: [21a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Türbedarlık görevini yapmayan Seyyid Mehmed Burhaneddin b. Hasan’ın azledilerek yerine Seyyid Ahmed’in tayin edilmesi
Ma‘rûz,
Sâdır olan fermân-ı âlîlerine imtisâlen işbu arz ve derkenâra nazar olundukda vilâyet-i Anadolu’da Bayburd-ı [ve] Erzurum kazâsında vâki‘ Yakutiye Medresesi Vakfı’ndan almak üzere yevmî iki akçe vazîfe ile türbedârlık cihetine mutasarrıf olan es-Seyyid Mehmed Burhaneddin b. Hasan Gümüşhane sekenâtından olup türbe-i mezkûrenin asla semtine uğrama[yıp] hizmet-i lâzımesi mu‘attal kalmağla türbe-i mezkûre harâb olacağından merkūm es-Seyyid Mehmed Burhaneddin’in ref‘inden mezbûr es-Seyyid Ahmed’e tevcîh olunması kazâ-i mezbûr nâibi es-Seyyid Hâfız Salih Kadri Efendi dâ‘îlerinin işbu mühr[ü] mutâbık arzından fi’l-hakīka cihet-i mezkûre merkūm es-Seyyid Mehmed Burhaneddin üzerinde olduğu derkenârdan müstebân ve merkūm es-Seyyid Mehmed Burhaneddin’in tarafından dahi edâ-i hizmet ve tarafından vekîl olmayıp, edilmediği ve mezbûr es-Seyyid Ahmed’in mahâll-i türbeye karîb olup vücûd-ı ehliyet ve istihkākı kazâ-i mezbûr ahâlîsinden müsâfiren sâkinler Abdi b. Mehmed ve Mustafa b. İbrahim nâm şahıs kimesnelerin alâ-tarîkı’ş-şehâde haber vermeleriyle zâhir ve bedîdâr olmağın bu sûretde ber-mûceb-i arz cihet-i mezkûre merkūm es-Seyyid Mehmed Burhaneddin’in târikü’l-hizmet olduğuna binâen ref‘inden erbâb-ı istihkākdan es-Seyyid Ahmed’e tevcîh, yedine müceddeden berat-ı celîlü’l-unvân ihsân buyurulması re’y (…). [Kayıt burada tamamlanmadan bitmiş ve yeni bir hüküm başlamıştır.]
|