Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 245 Hüküm no: 339 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın geçinemediği kocası Mehmed’den muhalaa yoluyla boşandığı Muhâla‘a Ma‘rûz İstanbul’da Taşkasab kurbünde Ördekkasab mahallesinde sâkine zâtı mu‘arrefe Şerife Âişe Hanım bt. el-hâzır [el-Hâc] es-Seyyid Mustafa b. Halil İstanbul Bâb Mahkemesi’nde meclis-i şer‘-i münîrde zevc-i muhâlı‘ı derûn-ı arzuhâlde mezkûrü’l-ism Mehmed b. Mustafa muvâcehesinde mezbûr Mehmed sekiz yüz bir guruş mehr-i mu‘accel-i müstevfâ ve altı yüz elli bir guruş mehr-i müeccel tesmiyeleriyle zevc-i dâhilim olup lâkin beynimizde hüsn-i mu‘âşeretimiz olmamağla mezbûrun zimmetinde mütekarrir ve ma‘kūdün-aleyh mehr-i müeccel-i mezkûrum olan altı yüz elli bir guruş ile nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile hul‘ olduğumda ol dahi hul‘-ı mezkûru ba‘de’l-kabûl hukūk-ı zevciyyete ve zevcim mezbûrun zimmetinde bir elmas yüzük ve bir sîm ile ve bir sagīr sedefkârî çekmece kıymetlerinden hakkım olan bin guruşun iki yüz elli guruşunu çend rûz zarfında bana edâya ta‘ahhüd etmekle bâkīsi olan yedi yüz elli guruşa ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i de‘âvîden ben zevcim mezbûrun zimmetini ol dahi kezâlik hukūk-ı zevciyyete ve ibtidâ-i zevciyyetden işbu târîhe gelince sâir cemî‘ hukūk-ı şer‘iyyeye müte‘allika âmme-i de‘âvîden benim zimmetimi her birimiz ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri huzûr-ı [âlîlerine i‘lâm olundu] Fî 22 Şevvâl sene [12]55