Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 246 Hüküm no: 340 Orijinal metin no: [45a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yuvan’ın alacak iddiasıyla Sarraf Serkiz’e açtığı davayı ispat edemediği 298 guruş men‘ Ma‘rûz Bakkāl Yuvan v. Vasil zimmî İstanbul Bâb Mahkemesi’nde meclis-i şer‘-i hatîrde sarrâf tâifesinden Serkiz v. Ohannes nâm zimmî muvâcehesinde mesfûr Serkiz zimmî zimmetinde bundan akdem mâlımdan ve yedimden iştirâ ve kabz eylediği bakkāl emti‘ası esmânından iki yüz doksan sekiz guruş alacak hakkım olmağla meblağ-ı mezkûru mersûm Serkiz zimmîden hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin ben deynim olan meblağ-ı mezkûru târîh-i i‘lâmdan beş ay mukaddem İstanbul’da Yenihan’da vâki‘ odamda müdde‘î-i mesfûr Yuvan zimmîye tamâmen edâ ve teslîm etmişidim deyü müdde‘î-i mersûmun inkârına mukārin eylediği def‘ine ikāmet-i beyyine edemeyip bi’t-taleb mesfûr Yuvan zimmîye bi’l-muvâcehe ber-nehc-i şer‘î üç def‘a yemîn teklîf olundukda ol dahi yemînden nükûl etmeğin mûcebince mersûm Yuvan zimmî da‘vâ-yı mezkûresiyle mesfûr Serkiz zimmîye bî-vech-i şer‘î mu‘ârazadan men‘ olunduğu mübâşirleri Bâb-ı Seraskerî kavaslarından Karamürselli Mehmed Kavas kulları yediyle huzûr-ı [âlîlerine i‘lâm olundu] Fî 2 Zilhicce sene 1255