Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 247 Hüküm no: 341 Orijinal metin no: [45a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marangoz Halil’in alacak iddiasıyla Ereğli kazası ayanı Mustafa Ağa’ya açtığı davada sulh oldukları 700 guruşa sulh Ma‘rûz Sâhib-i arzuhâl Marangoz Halil b. İsmail nâm kimesne İstanbul Bâb Mahkemesi’nde meclis-i şer‘-i münîrde sâbık Ereğli kazâsı a‘yânı derûn-ı arzuhâlde mezkûrü’l-ism Mustafa Ağa b. İsmail tarafından husûs-ı âti’l-beyânda vekîl olduğu Mehmed Ağa b. Halil Ağa [ve] ( ) b. Musa nâm kimesneler şehâdetleriyle ber-nehc-i şer‘î sâbit olan Mehmed Said Efendi b. Halil nâm kimesne muvâcehesinde ben müvekkil-i merkūm Mustafa Ağa ile beher şehr yüz seksen guruş ücret mukāvelesiyle kazâ-i mezkûr iskelesinde binâ ve inşâ eylediği sefinesinde sekiz ay müddet mu‘temedlik etmemle müddet-i mezkûrede ecr-i müsemmâmdan müvekkil-i merkūmun zimmetinde müctemi‘ alacağım olan bin dört yüz kırk guruşun ancak yirmi beş guruşunu müvekkil-i merkūm Mustafa Ağa bana edâ ve teslîm ben dahi yedinden ahz u kabz etmemle bâkīsi olan bin dört yüz on beş guruşu müvekkil-i merkūma izâfetle vekîl-i merkūm Mehmed Said Efendi’den hâlâ taleb ederim deyü tasaddî eylediğim da‘vâmdan bâ-tavassut-ı muslihîn vekîl-i merkūm [45b] Mehmed Said Efendi ile bi’t-tav‘ ve’r-rızâ yedi yüz guruş bedel-i medfû‘ ve makbûza ba‘de akdi’l-musâlaha ve’l-kabûl mâ‘adâya ve bi’l-cümle husûs-ı mezkûra ve hukūk-ı sâir-i şer‘iyyeye [ve sâir hukūk-ı şer‘iyyeye] müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile bi’l-asâle ve bi’l-vekâle kabûlü hâvî ibrâ ve iskāt eyledik deyü ikrâr ve tasdîkleri huzûr-ı [âlîlerine i‘lâm olundu] Fî 19 Zilhicce sene [12]55