Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 247 Hüküm no: 342 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un boşandığı kocası Hafız Ahmed Efendi’deki nafaka bedelini aldığı 500 guruş ahz [ü] kabz Ma‘rûz İstanbul’da Davudpaşa mahallesinde sâkine mu‘arrefetü’z-zât Fâtıma bt. Mehmed nâm hatun İstanbul Bâb Mahkemesi’nde meclis-i şer‘de vâlidesi zâtı mu‘arrefe Safiye bt. İsmail nâm hatun hâzıra olduğu hâlde zevc-i mutallıkı Hafız Ahmed Efendi b. Mustafa nâm kimesne muvâcehesinde mezbûr Hafız Ahmed Efendi’nin vâlidesi ve kezâlik mu‘arrefetü’z-zât Âişe Hatun bt. İbrahim hâzıra olduğu hâlde mezbûr Hafız Ahmed Efendi zimmetinde bâ-i‘lâm-ı şer‘î mehr-i müeccel ve nafaka-i müstahakkımdan müctemi‘ beş yüz guruş alacak hakkım olmağla meblağ-ı mezkûr beş yüz guruşu merkūm Hafız Ahmed Efendi bu def‘a huzûr-ı şer‘de bana def‘ ü teslîm ben dahi yedinden ahz u kabz etmemle hukūk-ı zevciyyete ve ibtidâ-i zevciyyetden işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i da‘vâdan ben ve vâlidem hâzıra-i merkūme ile ma‘an zevcim mezbûr Hafız Ahmed Efendi ile vâlidesi hâzıra-i merkūme Âişe Hatun’un zimmetlerini onlar dahi hukūk-ı zevciyyete ve ibtidâ-i zevciyyetden işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i de‘âvîden vâlidem hâzıra-i merkūmenin zimmetlerini her birimiz ibrâ-i âmm-ı sahîh-i şer‘î ile kabûllerimizi hâvî ibrâ ve iskāt eyledik deyü ikrâr ve tasâdıkları mübâşirleri Bâb-ı Seraskerî kavaslarından Zağferanborlulu (Safranbolulu) Emin Kavas kulları yediyle huzûr-ı [âlîlerine i‘lâm olundu] Fî 13 Zilhicce sene 1255